Отандық сақтандыру компаниясының хабарлауынша, көлік жүргізіп келе жатып, селфи жасау жүргізушіні 14 секундқа, ал әлеуметтік желілердегі ақпараттарды көру 20 секундқа алаңдатады. Мұның салдары еліміз бойынша жол-көлік апатының көбеюіне алып келді.
Зерттеуге қатысқан Алматы және елорадалық жүргізушілердің 39,6%-ы көлік айдап келе жатып ұялы телефонды пайдаланатынын мәлімдеген. Бүгінде жүргізушілердің 75%-ы рөлде отырып қоңырауларға жауап берсе, 21%-ы рөлде келе жатып хабарлама жазады екен. Сонымен көлік жүргізу барысында қауіптілігі жоғары 3 әрекет.
Ұялы телефонмен сөйлесу. Жүргізушілер қоңырауға жауап беру арқылы басын қатерге тігеді. Сауалнамаға қатысушылардың 18%-ы ұялы телефонмен сөйлесу көлік қозғалысына қатысушыларға кедерге келтіретінін айтқан. Тіпті респонденттердің 8%-ы көлікте келе жатқан жолаушының әңгімесі жүргізушіге кері әсер ететінін мойындаған.
Хат алмасу да көлік басқаруға кедергі келтіреді. Бұл екінші орында. Сауалнамаға қатысушылардың 14%-ы SMS-хабарлама жазу, аудио хабарлама жіберу жүргізушінің назарын бөлетінін мәлімдеді. Бүгінде екі алып шаһар жүргізушілерінің 7%-ы бір қолымен хат жазып, екінші қолымен көлік айдайтынын мойындапты.
Үшінші орында селфи жасау. Сауалнамаға қатысқандардың 12%–ы селфи жасау, Instagram-ға видео, фото немесе сторис түсіріп, желіге орналастыру сияқты іс-әрекет рөлдегі адамның ойын бөлетінін айтқан. Алматы және Нұр-Сұлтан қаласындағы әрбір екінші (18-24 жас) жүргізуші күніне кем дегенде бір рет көлік айдап келе жатып, сторис жасап, суретке түсіп, тікелей эфир ұйымдастыратынын айтқан.
Бұдан бөлек, сауалнамаға қатысушылардың 8%-ы рөлде отырғанда балалардың у-шуы да ойды бөлетінін мәлімдеген.
Респонденттердің 7%-ы көлік айдап келе жатып темекі шегу де жүргізушіні алаңдататынын айтқан.
ҚР Бас прокуратурасының Құқықтық статистика және арнайы есепке алу жөніндегі комитетінің деректеріне сәйкес, 8 айда 8307 жол-көлік оқиғасы тіркелген. Салдарынан 12205 адам зардап шекті. Жол-көлік апаты 10,2%-ға артқан. Зардап шеккендер саны өткен жылдың осы кезеңімен салыстырғанда 11,2%-ға өсті. Түрлі жол-көлік апаты нәтижесінде 10947 адам дене жарақатын алып, 1258 адам қаза тапты, бұл өткен жылдың 8 айымен салыстырғанда 17,7%-ға артық.
.