Іс қылмыстық сотта бір айға жуық қаралды. 49 жастағы Хайрулла Юлдашев бес жаяу жүргіншінің өліміне кінәлі деп танылды. Прокуратураның мәліметінше, ол автобустан түскенде қол тежегішті қоюды ұмытып кеткен. Жарыссөзде прокурор айыпталушыға 8 жыл беруді сұрады. Алайда қорғаушы ол үкіммен келіспеді. Дегенмен сот жүргізушіні 5 жылға соттады.
"Сотталушының кінәсі дәлелденді. Сот үкімімен ол кінәлі деп танылып, 5 жылға сотталды. Сондай-ақ 7 жылға жүргізуші куәлігінен айырылды. Жәбірленуші Дариға Сейдалиеваға келтірілген материалдық шығын қанағаттандырылсын", – деп үкімді оқыды судья Жанат Мүсірәлі.
Сурет: Zakon.kz/Карина Әділбекова
Сотталушының туыстары апелляциялық шағым түсіретінін жеткізді. Жәбірленуші тарап жүргізугі кінәсен мойындап кешірім сұрағандықтан кешіргеніне қарамастан, үкіммен келіспейді.
Қайғылы оқиға 2023 жылғы 8 сәуірде сағат 18:30 шамасында "Метро" сауда орталығының маңындағы екі көшенің қиылысында болды. Жолаушылар автобусы қарсы бағытқа, одан кейін тротуарға шығып, алты адамды қақты. Автобуста жүргізуші болмаған. Апат салдарынан бес адам қайтыс болды (үшеуі оқиға орнында, екеуі ауруханада), тірі қалған жалғыз адам мүгедек болып қалды.
