Департаменттің мәліметінше, Челябинск қаласынан Жаңатасқа бағыт алған жүк тасымалдаушы цистерналар Астана қаласындағы Астана станциясындағы парктердің бірінің екінші жолында тоқтағанда теміржол қызметкерлері цистернада жарық пайда болғанын, одан күкірт қышқылы төгілгенін анықтады.
"Департаменттің және Астана қаласындағы "Ұлттық сараптама орталығы" ШЖҚ РМК филиалының мамандары оқиға орнына шұғыл жетіп, күкірт қышқылының төгілу фактісіне байланысты атмосфералық ауа сынамаларын алды. Зерттеу нәтижелері бойынша, ауадағы зиянды заттардың деңгейі шекті рұқсат етілген мөлшерден аспағаны анықталды. Қазіргі уақытта күкірт қышқылының ағуы тоқтатылды, зардап шеккендер мен қаза тапқандар жоқ", делінген хабарламада.
Айта кетсек, күкірт қышқылы – химиялық тұрғыдан өте белсенді және қауіпті заттардың бірі. Ол теріге, шырышты қабаттарға және тыныс алу жүйесіне қатты тітіркендіру әсерін тигізуі мүмкін.
Күкірт қышқылының булары мен
аэрозольдерімен ұзақ уақыт байланыс болған жағдайда:
- Жүйке жүйесіне зиян келуі мүмкін;
- Өкпенің ісінуі және тыныс алу жолдарының күйіп қалуы мүмкін;
- Көздің зақымдалуы, соның ішінде көру қабілетінің жоғалуына әкелуі мүмкін;
-
Терінің химиялық күйіктері
пайда болады.
Сондықтан күкірт қышқылымен байланысқа түскен кезде қауіпсіздік шараларын сақтау және зардап шеккен аймақтарды дереу суық сумен шаю қажет.
