Желтоқсанның 11-і күні Ішкі істер министрінің орынбасары Санжар Әділов Талғарда 16 жастағы жасөспірімнің өліміне қатысты тергеу аяқталуға жақын екенін хабарлады.
"Алматы облысының полиция департаменті Талғар қаласында адам өлтіру фактісі бойынша қылмыстық іс қозғады. Сонымен қатар, ұрлық, бұзақылық, қорқыту және қылмыс туралы хабарламау фактілері бойынша сегіз қылмыстық іс тіркелді.Іс бойынша 11 айыпталушыға қатысты "қамау" бұлтартпау шарасы таңдалды. Қазіргі уақытта сотқа дейінгі тергеп-тексеру жүргізілуде, оның қорытындысы бойынша процессуалдық шешім қабылданатын болады", — деп жауап берді ҚР ІІМ баспасөз қызметі ҚазАқпараттың 2025 жылғы 10 қаңтардағы сауалына.
2024 жылдың 4 қазанында Талғарда жаппай төбелес болып, оның барысында 16 жастағы Шерзат Полат пышақ жарақатынан қайтыс болды. Қоғамдық резонанс тудырған жасөспірімді өлтіру дерегі бойынша ҚР Қылмыстық кодексінің бес бабы бойынша 11 күдікті қамауға алынды.
2025 жылдың 3 қаңтарында Қасым-Жомарт Тоқаев Шерзат Полаттың өлтірілуі туралы айтты. Президент "тергеу әрекеттері аяқталды, жақын арада бұл іс бойынша сот процесі өтетінін" мәлімдеді.