Соттың 2025 жылғы 10 маусымдағы мәліметі бойынша, әйелге дәрменсіз жағдайда болған екі кәмелетке толмаған баланы өлтірді деген айып тағылған.
"Сот 2025 жылдың 23 наурызында Қандыағаш қаласы, Самал ықшам ауданында Д.-ның ақыл есі дұрыс емес күйде пәтерінде 2022 және 2024 жылы туған кішкентай балаларын жастықпен тұншықтырып өлтіргенін анықтады. Күдікті сот отырысына қатысқан жоқ. Оның соттағы өкілі, әпкесі жақында босанғаннан кейінгі депрессиямен ауырып, емделіп жатқанын айтты", – делінген сот хабарламасында.
Прокурор соттан сотталушыға медициналық сипаттағы мәжбүрлеу шараларын қолдануды сұрады.
"Қылмыстық кодекстің 99-бабының 3-бөлігі бойынша жаза өмір бойына бас бостандығынан айыруды қарастырады. Психологиялық-психиатриялық сараптаманың қорытындысына сәйкес Д.-ның есі дұрыс емес екендігі анықталды және оған қарқынды түрде стационарлық мәжбүрлі емдеу қажет", – деп хабарлады сот.
Сот сотталушыны қылмыстық заңмен тыйым салынған қоғамға қауіпті әрекетті есі дұрыс емес жағдайда жасаған деп танып, қылмыстық жауаптылықтан босатты. Оған қатысты күшейтілген психиатриялық стационарда емдеу түріндегі медициналық сипаттағы мәжбүрлеу шараларын қолдану туралы шешім қабылданды.
Сот қаулысы заңды күшіне енген жоқ.
Бұрын хабарланғандай, сотталған әйел Атырау облысында мұғалім болып жұмыс істеген. Ол балаларымен Қандыағаш қаласына әке-шешесіне келген.