Төтенше жағдайлар министрлігінің мәліметінше, 2026 жылғы 16 қазанға қараған түні Қызылорда қаласындағы Жаппасбай батыр көшесінде орналасқан бесқабатты тұрғын үйдің төртінші қабатындағы пәтерде өрт шыққан.
Құтқарушылар көрші пәтерлерден үш адамды, оның ішінде екі баланы эвакуациялады.
"Өрт сөндірушілердің жедел әрекетінің арқасында өрт толық сөндірілді. Өрт аумағы 20 шаршы метрді құрады", – делінген хабарламада.
Зардап шеккендер жоқ. Өрттің шығу себебі анықталып жатыр.
2026 жылғы 14 қазанда таңертең Шығыс Қазақстан облысындағы ауылдардың бірінде тұрғын үйден шыққан өрттен әйел мен екі кішкентай бала қаза тапқан еді.