Полиция департаментінің мәліметінше, 102 жедел байланыс желісіне өзін Қордай көшесінде екі белгісіз жігіт ұрып-соғып, тонап кеткені туралы 26 жастағы азаматтан хабарлама келіп түсті.
Шабуыл жасалған сәт сыртқы бейнебақылау камераларына түсіп қалған. Бейнежазбада екі жігіттің ер адамға жақындап келіп, соққы бере бастағанын көруге болады. Қаскөйлер оның қолынан сөмкені жұлып алып, қаша жөнелген. Жәбірленуші оларды қуғанымен, одан нәтиже болмаған.
Қаскүнемдердің олжасы 1400 АҚШ доллары болды.
“Алматы” аудандық полиция бөлімінің қызметкерлері жедел-іздестіру іс-шараларын жүргізу барысында 19 және 17 жастағы күдіктілердің екеуін де ұстады.
Қазіргі уақытта сотқа дейінгі тергеу амалдары жүргізілуде, тонаушылық жасаған 19 жастағы күдіктілердің біреуі ПД уақытша ұстау изоляторына қамалды.
Кәмелетке толмаған жасөспірімді ювеналды полиция қызметкерлері ерекше бақылауға алды. Олардың шетел валютасын теңгеге айырбастап, кейін біразын өз қажеттіліктеріне жұмсап үлгергені анықталды. Қалған қаражат тәркіленді.