Бұл арада Қазақстанда көші-қон заңнамасын өрескел бұзып жүрген Өзбекстан, Тәжікстан және Ресей Федерациясының азаматтары туралы сөз болып отыр. 37 заңсыз мигрантты полиция қызметкерлері "Қауіпсіз жол" республикалық жедел-алдын алу іс-шарасы барысында анықтады.
"Іс-шара барысында көші-қон заңнамасын бұзған 330 адам әкімшілік жауапкершілікке тартылды, 28 шетелдік ҚР-нан шығарылды. Қазақстан Республикасында болу ережелерін бұзғаны үшін 2 319 шетелдік жауапкершілікке тартылды. Шетелдіктердің ҚР-да болуының заңдылығын қамтамасыз ету шараларын қолданбағаны үшін 89 қабылдаушы тарапқа айыппұл салынды. Қазақстан Республикасына шетелдік жұмыс күшін тарту ережелерін бұзғаны үшін 10 жұмыс беруші жауапқа тартылды", - дейді Алматы қалалық ПД Көші-қон қызметі Басқармасының бастығы Еркін Амантаев.
Сондай-ақ бүгін Қарағанды облысының прокуратурасы шетелдіктерге 700-ден астам уақытша тұруға ықтиярхаттың заңсыз берілуін тексеріп жатқанын хабарлады.