Қазақ мемлекеттік қыздар педагогикалық университетінде «Дара» педагогикалық-психологиялық орталығы ашылады, деп хабарлайды zakon.kz оқу орнының Баспасөз орталығы берген ақпаратқа сілтеме жасап.
Коррекциялық кабинет «Дара» қайырымдылық қорының ұйымдастыруымен жоғары оқу орнының базасынан алғаш рет пайдалануға берілмек.
Мақсат – еліміздегі арнайы және инклюзивті білім беруді институтционалды қолдау және Дефектология мамандығында оқитын студенттер мен магистранттарды практикалық, ғылыми-зерттеушілік жұмыстарын ұйымдастыру.
Бұл орталық мүмкіндігі шектеулі балалардың адамгершілік, еңбексүйгіштік қасиеттерін қалыптастырып, олардың өмірге деген құштарлық сезімдерін ояту, ой-өрістері мен ойлау қабілеттерін жетілдіріп, толыққанды азамат дәрежесіне жеткізу мақсатында жұмыс жасайды.
– Жалпы білім беретін мектепте даму мүмкіндігі шектеулі балаларға қолайлы жағдай жасау – біздің басты міндетіміз. Бала саулығы мен оқыту жолындағы жұмыстарыңызға сәттілік тілеймін, – деді Қыздар Университетінің ректоры Гаухар Алдамбергенова.