Жезқазған мыс қорыту зауыты күкірт-қышқыл цехының жұмысшысы қаза тапты, деп хабарлайды ҚазАқпарат тілшісі «Қазақмыс» корпорациясының баспасөз қызметіне сілтеме жасап.
«2018 жылдың 1 шілде күні «Kazakhmys Smelting» ЖШС-не қарасты Жезқазған мыс қорыту зауыты күкірт-қышқыл цехының маңайында соңы өлімге әкеп соққан оқыс оқиға тіркелді. Шаң, газ тазарту құрылғыларының операторы желдеткішті тазалау барысында қатты жарақат алып, бірден жан тапсырған» делінген хабарламада.
Қайғылы оқиғаның себеп-салдары анықталып жатыр. Оқиғаның мән-жайын тергеу үшін арнайы комиссия жасақталды. «Kazakhmys Smelting» ЖШС басшылығы мен қызметкерлері қаза тапқан жұмыскердің туған-туыстары мен жақындарына қайғырып көңіл айтады.
