Жеті күннің ішінде астаналық полицейлер 300-ден астам ойын сауық орындарын тексеріп, жасөспірімдердің қатысуымен 200-ге жуық әкімшілік құқық бұзушылықты анықтады, деп хабарлайды Елорда Инфо Астана қаласының ІІД баспасөз қызметіне сілтеме жасап.
Айта кетейік, Жергілікті полиция қызметі ағымдағы жылдың 27-ші тамызы мен 5-ші қыркүйегі аралағында «Жасөспірім» жедел-профилактикалық іс-шарасын жүргізуде.
Шараның мақсаты - жасөспірімдердің арасындағы қылмысты, кәмелетке толмағандардың алкоголь, есірткі және психотроптық заттарды пайдалану фактілерін алдын алу, олардың түнгі уақытта тұрғын жайдан тыс жерлерге және ойын-сауық мекемелеріне бару фактілерін анықтау.
Аталған іс-шараны өткізуге жергілікті атқарушы органдар, білім, денсаулық сақтау басқармасы, ата-аналар комитеті және үкіметтік емес ұйымдардың өкілдері қатысуда.
«Жасөспірім» жедел алдын алу іс-шарасының 7 күндік қорытындысы бойынша 300-ден астам ойын-сауық орындары (мейрамхана, дәмхана, барлар, түнгі клубтар мен компьютер клубтары т.б.) мен жастардың көп жиналатын орындары (бақтар, саябақтар мен демалыс орындары т.б.) тексерілді. Тексеру нәтижесі бойынша 200-ге жуық әкімшілік құқық бұзушылықтар анықталып, 220-дан астам жасөспірім ІІБ-на жеткізілді» делінген ведомствоның хабарламасында.
Бұған қоса, 6 қолайсыз отбасы профилактикалық есепке қойылды.