Бүгін түнде Мүткенов көшесі, 58 мекенжайы бойынша орналасқан тұрғын үйден шыққан өрттен 35 адам құтқарылды. Оның оны – бала, деп хабарлайды pavlodarnews.kz тілшісі.
Бұл туралы облыстық ТЖД-нің баспасөз қызметі мәлім етті.
- Бірінші подъезде, екінші қабатта бес бөлмеге ортақ ас бөлмесінде жиһаздар мен терезенің ағаш жақтауы, есік жанған. Қызыл жалын сегіз шаршы метрді шарпып өткен. Өрт шыққаны туралы хабарлама сағат 00.08-де түсті, сағат 01.04-де толығымен сөндірілді, - дейді департаментте.
Тілсіз жауды ауыздықтауға газ-түтіннен қорғау қызметінен екі звено, № 34 өрт сөндіру бөлімі, № 1 мамандандырылған өрт сөндіру бөлімінен 18 адам жұмылдырылды.
Алдын ала болжам бойынша, өрттің шығуына шылым тұқылы себеп болған. Оқиға орнында медициналық апаттар орталығы мен жәдел жәрдем қызметі 1936 жылғы әйел адамға көмек көрсетті.
Зейнеткер аурухаға барудан бас тартты. Қазіргі таңда келтірілген шығын көлемі анықталуда.
