Алматы қаласының әкімі Бақытжан Сағынтаев Орталық коммуникациялар қызметінде журналистер алдында сөз сөйледі, деп хабарлады zakon.kz.
Коронавирус пандемиясына байланысты баспасөз конференциясы онлайн режимінде өтіп жатыр.
12:31 Бақытжан Сағынтаев өз сөзін журналистерді кәсіби мерекесімен құттықтаудан бастады.
12:32 Ол Алматыдағы коронавирусқа байланысты жағдайға тоқталды. Егер жағдай нашарласа, үш аурухананы жұқпалы аурулар ауруханалары етіп ауыстыруға болады. Жақын арада Алматы "үнді" штамына байланысты "қызыл" аймаққа өтуі мүмкін. Қазірге дейін қалада 400 мыңнан астам адам екпе алды.
12:38 ШОБ қолдау үшін дағдарысқа қарсы шаралар қабылданды. Олар салық төлеуден және жалға алу төлемдерінен босатылды.
12:40 Инвестициялар туралы. Монтфорт-Қазақстан британ университетінің филиалы қыркүйек айында ашылады.
12:43 Креативті индустрия туралы. Қаладағы барлық IT компаниялардың тізілімі жасалды, бағдарламалашылардың француз мектебі іске қосылады. Сейфуллин көшесіндегі бұрынғы тергеу изоляторының базасында Креативті индустрия паркі пайда болады.
12:46 Туризм туралы.
Биыл біз тауда тікұшақ алаңын, екі бақылау-құтқару пунктін ұйымдастыруды жоспарлап отырмыз, онда 16 құтқарушы тәулік бойы кезекшілік етеді. Сондай-ақ, біз құтқарушылардың пультіне SOS спутниктік дабылын жіберу мүмкіндігі бар шалғай аудандарда 15 саят орыны құрылысын жүргізуді жоспарлап отырмыз, - дейді әкім.
12:49 Алматыда тозығы жеткен баспана мәселесі өзекті. Қала билігі осындай баспаналарды қалыпқа келтіру бағдарламасын іске қосты. Баспана барлық тұрғындардың 100% келісімімен сүріледі. Ғимараттарды тығыз орналасу мәселесі де бар. Мәселені шешу үшін құрылыс ережелері қабылданды. Енді құрылыс салушылар балабақшаларға, мектептерге, емханаларға, полиция учаскелеріне орын қарастыруға міндетті болады.
12:55 Алматыда алты спорттық-сауықтыру кешені салынады.
12:59 Алматы қаласы әкімдігінің баспасөз қызметі Орталық коммуникация қызметіндегі әкімнің суретін жолдады.
13:00 Әкім есеп берді. Сұрақ-жауап сессиясы басталады. Модератор әкімге 40-қа жуық журналист сұрақтар қойғысы келетінін айтты.
13:04 Жанар Сердалина, BestNews.kz журналисі әкімге құттықтауы үшін алғысын білдірді. Ол азық-түлік бағасын тежеу үшін Алматы әкімдігі қандай шаралар қолданып жатқанын сұрады.
Қазір маусымдық кезең. Сол себепті нақ көкөністер мен басқа да өнім түрлерінің бағасы өсті. Енді біз Түркістан облысымен осы мәселелерді пысықтап жатырмыз. Біз Тәжікстанмен тікелей жұмыс істейміз, алғашқы тауар тасымалы жүзеге асырылып жатыр. Картопты Павлодардан аламыз, келісімшарттар жасалған. Барлық ірі базарларда әлеуметтік дүкендер ашылды, онда баға 30% төмен. Жұмыртқаға шекті бағаны қойдық, қазір қырыққабатпен жұмыс істеп жатырмыз, - деді әкім.
13:10 Сағынтаевтан өзі жауапты қаладағы ауа сапасы туралы сұралды. Әкім көліктің көптігі кесірінен ауа лас екенін айтты. Мәселені шешу үшін ауа сапасы қалай өзгеріп отыратынын көрсете алатын құрылғылар орнатылды. "Жасыл Алматы" бағдарламасы бар, оған сәйкес үш жыл ішінде миллионға жуық ағаш отырғызуды жоспарлап отырмыз. Сондай-ақ ЖЭО-2 құрылысының аяқталуын күтіп отырмыз, адамдардың велосипедке отыруына жағдай жасалады.
13:20 The Qazaq Times журналисі Қытайдан келген қандастардың митингіcіне қатысты сұрақ қойды. "Неге әкімдік оларға митинг өткізуге рұқсат бермейді", - деп сұрады ол.
Өткен жылы бейбіт митингілер туралы заң қабылданды. Ол үшін үш орын бөлінген. Қандастар ақпанда митингі өткізу үшін әкімдікке бір рет жүгінген, бірақ қолдағы құжаттары заңға сай келмеді. Содан кері қайырдық. Осыдан кейін бізге мұндай өтініштер түскен жоқ. Егер өтініш келіп түспесе, біз қалай рұқсат бере аламыз?
Егер оларға қарсы күш қолданылған болса, онда полиция бөліміне жүгінуі керек, - деді әкім.
13:35 Алматыда коронавирустың "үнді" штамының анықталуына байланысты локдаун жариялана ма деген сұрақ қойылды. Әкім локдаун болмайтынын, бірақ карантиндік шаралар күшейтілетінін айтты. Осыған байланысты қ азір жаңа қаулы дайындалып жатыр.
Мүмкін локдаун болмайды, бірақ шектеу шаралары күшейтіледі. Қаулы жобасын санитарлық-эпидемиологиялық қызмет департаменті қазір дайындап жатыр. Енді біз Денсаулық сақтау министрлігі жанындағы комитеттің шешімін күтеміз. Комитеттің алғашқы қаулысы шыққан бойда біз де қала қаулысын шығарамыз. Аурудың қаншалықты тез таралып жатқанын бәріміз көріп отырмыз, сондықтан бұл жағдайда бәрі түсіністікпен әрекет етеді деп ойлаймын және мұндадайда, ең алдымен, вакциналау процесін арттыру керек, - деді әкім.
13:40 Сағынтаевқа Алматыдағы жұмыссыздық туралы сұрақ қойылды.
Салықтардың 64% -ы ШОБ-тан түседі. Олардың барлығы тұрып қалды (пандемияға байланысты - ред.) Бұл, әрине әсер етті (экономика - ред.). Қазір жағдай түзеліп келеді, экономика бұрынғы бағытына, қалыпты өміріне қайта оралуда. Бүгінгі күні барлық салалар жұмыс істеп жатыр, бұған мемлекеттік қолдау шаралары көмектесті, атап айтқанда салықты кейінге шегеру, несиелер, жалға алу құнын субсидиялау және т.б. Әрине, бұл біздің шағын және орта бизнестің аяғынан тұруына және жақсы өсу қарқынын көрсетуге мүмкіндік берді, - деді әкім.
13:52 Журналист Серікжан Мәулетбай Бақытжан Сағынтаевқа кәсіби мерекесімен құттықтағаны үшін алғысын білдіріп, барлық әріптестерінің сұрақ қоюына мүмкіндік беруді сұрады, әсіресе ол сұраққа егжей-тегжейлі жауап беретін аз шенеуніктердің бірі екенін еске салды. Содан кейін журналист автомобильден бөлек көлік құралдары туралы сұрақ қойды.
Әкім велосипед жолдарын дамыту үшін бел шеше жұмысқа кірісіп жатқан жаңа штаттан тыс кеңесшісі барын айтты. Өткен жылдың соңында қала билігі велосипед инфрақұрылымын дамыта бастады, қалада көлік кеңесі құрылды, кеңес мүшелерінің жартысы қоғам белсенділері мен сарапшылар. Әкім қала тұрғындарының скутерлерді жиі қолдана бастағанын атап өтті. Инфрақұрылым дамуда. Мопедтерге келетін болсақ, оларды көбіне тамақ жеткізушілер пайдаланады. Олардан каска кию және жылдамдықты сақтау талап етіледі.
13:55 Журналист тағы бір сұрақ қойғысы келіп ұмтылғанда, әкім одан кешірім сұрап, бір жыл бойы әр сәрсенбі сайын қалалық телеарна эфирінде есеп беріп келе жатқанын ескертті.
Мен сізді ел алдына шығып, сұрақ-жауап жүргізетін сирек шенеуніктің бірі екеніңізді, адамдармен және бізбен үнемі қарым-қатынаста болатыныңызды айттым, сондықтан мүмкіндігіңізше барлық әріптестеріме әдеттегідей жауап беруге тырысуыңызды сұрадым, - деді журналист.
Кешіріңіз, мен дұрыс естімей, сіздің сөзіңізді басқаша түсініп қалдым, - деп жауап берді әкім.
14:12 Журналист Айнұр Коскина проблемалық құрылыс жайын сұрады.
Әкімнің айтуынша, құрылыс ережелері қабылданған. Ережеге сәйкес, әлеуметтік нысандардың қадамдық қолжетімді болуы үшін құрылыс салушы құрылыс кезеңінде 1 мың адамға шаққанда 100 орыннан кем емес балабақша, 1 мың адамға шаққанда 180 орынан кем емес мектептер, емханалар және полиция пункттерін салатын орындарды қарастыруы тиіс, сондай-ақ олар үйлер арасындағы қашықтықты сақтап, жасыл желектер отырғызуы керек.
Мен мұны дұрыс деп санаймын. Басында олар (құрылыс салушылар - ред.) жақын маңдағы тұрғын үйлердің тұрғындарымен бәрін келісіп алуы керек, - деді әкім.
Сағынтаев әкімдік тарихи орталықтар орналасқан жеке меншікке жататын жер учаскелерін сатып ала бастағанын айтты. Бұл туралы бұрын хабарланған болатын.
Біздің шешімдерімізді сотқа беретіндер де болады, кейбір жағдайларда жеңіске жетіп жатады, бірақ біз барлық жолмен соңына дейін күресеміз, қатаң ережелер бар, соларға сүйенеміз, - деді ол.
14:26 "Азаттық" тілшісі Бағдат Асылбек: "Қазақфильмнің" жері жеке меншікке беріледі ме" деп сұрады.
Бұл жер ешкімге берілмейді. Біз қазір "Қазақфильммен" жобалар жасап жатырмыз, - деп жауап берді әкім.
14:38 Әкімнен пандемия кезінде бизнеске көрсетілген көмек жайында сұралды. Ол салықты кейінге шегеру, жалға алу ақысынан босату шараларын қайталап сөз етті.
14:42 Модератор әкімнің сұқбатына екі сағаттан астам уақыт болғанын ескертті.
Бақытжан Сағынтаев БАҚ өкілдеріне қойған сұрақтары үшін алғысын білдірді. Ол әр сәрсенбі сайын сағат 19: 00-де қалалық телеарнада тұрғындардың сұрақтарына жауап беретінін еске салды. Басқарма басшылары да халықпен ұдайы байланысқа шығады. Сонымен қатар, әр ауданда Whats App чаттары бар, онда тұрғындар аудан басшыларымен тікелей хат жазысып, мәселелерін ортаға сала алады.
14:47 Баспасөз конференциясы аяқталды. Модератор қойылған барлық сұрақтарға енді баспасөз қызметі жауап беретіндігін хабарлады.
