Сенаттың Халықаралық қатынастар, қорғаныс және қауіпсіздік комитетінің төрағасы Мұхтар Құл-Мұхаммед Төтенше жағдайлар министрі Юрий Ильинді жұмысты жедел жүргізуге шақырды, деп хабарлайды Zakon.kz.
Кейде кейбір оқиғалар мен төтенше жағдайлар бойынша Мемлекет басшысы Сіздің министрліктің жауапты қызметкерлеріне қарағанда тезірек әрекет етеді. Сізге жылдамдық жетіспейді. Болашақта мұны ескеру керек, – деді Мұхтар Құл-Мұхаммед Үкімет сағатында.
Ол Президент тарапынан ведомствоның жұмысы үшін барлығы жасалғанын атап өтті. 9 қыркүйекте Төтенше жағдайлар министрлігін құру туралы Жарлыққа қол қойылғанын еске салды.
Сіз бұл саланы бұрыннан білесіз, жылдар бойы осы жүйеде жұмыс істеп келесіз. Мен келесі жылға арналған бюджетті қарадым және сіздің министрліктің көптеген өтінімдері қолдау тапты. Баяндамада айтылғандай, сіз заңнамалық актілерді бастағыңыз келеді. Іс жүзінде бізде өнеркәсіптік қауіпсіздіктің талаптары мен нұсқаулары ескірген. Осыған байланысты көптеген төтенше жағдайлар туындайды. Егер сіз осы заң жобаларын әзірлеп үлгермесеңіз, комитет көмектесуге дайын. Оның үстіне біздің комитетте өмір бойы Орталық Қазақстанның индустриялық кәсіпорындарында жұмыс істеген осы саладағы ірі маман бар, ол – Сергей Ершов. Біз көмектесуге дайынбыз, – деді сенатор.
Бұған дейін ТЖМ басшысы шахталардың бірінде жарылыс болған Қарағанды облысындағы жағдай туралы айтып берген еді. 7 қарашада "АрселорМиттал Теміртау" АҚ "Абай" шахтасында жарылыс болды. Апат болған кезде онда 64 адам жұмыс істеген. Апат салдарынан екі адам зардап шегіп, алты шахтер қаза тапты.
Дайана Тоқберген
