29 наурызда Мемлекет басшысы Қасым-Жомарт Тоқаев VIII сайланған Қазақстан Республикасы Парламентінің бірінші сессиясының ашылуында сөз сөйлейді. Шараға мемлекеттік органдардың басшылары, Ұлттық Құрылтай мүшелері, қоғам қайраткерлері шақырылған.
Президенттің Парламент палаталарының бірлескен отырысында сөйлеген сөзі республикалық телеарналар мен әлеуметтік желілерде 29 наурыз күні сағат 10:00-де тікелей эфирде көрсетіледі.
27 наурызда Қасым-Жомарт Тоқаев сегізінші сайланған Қазақстан Республикасы Парламентінің бірінші сессиясын шақыру туралы өкімге қол қойды. Бұл шақырылымның бұрынғылардан ерекшелігі – Мәжіліс сайлауы пропорционалды-мажоритарлық жүйе бойынша өткен. Өткен жылғы Конституцияға енгізілген өзгерістерден кейін Мәжіліс 98 депутаттан тұрады (бұл 107), оның 69-ы партиялық тізім бойынша, 29-ы бір мандатты округтер бойынша сайланды.
27 наурызда ҚР Орталық сайлау комиссиясының төрағасы Нұрлан Әбдіров Қазақстан Республикасы Парламенті Мәжілісі сайлауының соңғы нәтижелерін жариялады.
ҚР ОСК мәліметінше, «Аманат» партиясына 3 431 510 адам дауыс берді, 53,9%, 40 мандат; «Ауыл» халықтық-демократиялық патриоттық партиясы – 693 938, 10,9 %, 8 мандат; Қазақстанның «Ақ жол» Демократиялық партиясы – 535 139, 8,41%, 6 мандат; Қазақстан халық партиясы – 432 920, 6,8 %, 5 мандат; «Республика» партиясы – 547 154, 8,59%, 6 мандат; Жалпыұлттық социал-демократиялық партиясы – 331 058, 5,2%, 4 мандат; «Байтақ» қазақстандық жасыл партиясы – 146 431, 2,3%, Мәжілістен депутаттық мандат алмайды. «Бәріне қарсы» деген бағанды 248 291 қазақстандық, 3,9% таңдаған.
Сондай-ақ Нұрлан Әбдіров бір мандатты округтер бойынша Қазақстан Республикасы Парламенті Мәжілісі сайлауының түпкілікті қорытындысын жариялады.
ОСК мәліметінше, сайлаушылар тізіміне 12 035 578 азамат енгізіліп, дауыс беруге 6 366 441 азамат қатысты.
28 наурызда Орталық сайлау комиссиясы партиялық тізімдер бойынша, сондай-ақ аумақтық бір мандатты сайлау округтері бойынша сайланған VIII сайланған Парламент Мәжілісінің депутаттарын тіркеді.
Қазақстанда 2023 жылғы 19 наурызда Қазақстан Республикасы Парламенті Мәжілісі мен мәслихаттар депутаттарының кезектен тыс сайлауы өтті.
