Кешенді жоспарды іске асыру 4 бағыт бойынша іс-шараларды қамтиды:
бюджет қаражаты мен шәкіртақыны көтеру бойынша міндеттемелер;
жаңа жұмыс орындарын құру арқылы халықтың табысын арттыру;
халық табысының сатып алу қабілетін қорғау;
табыс деңгейін арттыру бойынша жүйелі шаралар.
Үкіметтің жоспарлауынша, кешенді жоспар іске асса, «халықтың нақты ақшалай табысының орташа жылдық өсу қарқыны 4-5% деңгейіне жетеді және 2 миллионнан астам жұмыс орны құрылады».
Құжатта Қазақстанда табысы ең төменгі күнкөріс деңгейінен төмен халықтың үлесі 5,3 %-ды құрайтыны көрсетілген. ЭЫДҰ әдістемесі бойынша Қазақстандағы кедейшілік деңгейі орта есеппен 10 %. ЭЫДҰ елдерінде кедей халықтың үлесі 11,6 % (АҚШ-та – 16,8 %, Израильде – 17,7 %, Чилиде – 16,8 %, Канадада – 14,2 %, Аустралияда – 12,8 %, Ұлыбританияда – 10,8 %).
Бұл ретте 12 облыста (Атырау, Батыс Қазақстан, Жамбыл, Қарағанды, Қостанай, Қызылорда, Маңғыстау, Павлодар, Солтүстік Қазақстан, Түркістан, Шығыс Қазақстан облыстары және Нұр-Сұлтан қаласы) табысы ең төменгі күнкөріс деңгейінен төмен халықтың үлесі артып келеді.