Қазақстан азаматтарына мемлекеттік қызметтерді барынша қолдануға ыңғайлы болу үшін бүгінде Қазақстанның шетелдердегі мекемелерінде "egov.kz" портал арқылы көрсетілетін 17 қызметтің 10-ы іске қосылды. Шетелде азаматтық хал актілерін тіркеу, жекелеген санаттағы электронды визаларды беру, консулдық есепке қою және алу, шетелде ЭЦҚ алу, сонымен қатар Қазақстандағы шетелдік инвесторлық қызметпен байланысты электронды өтініш беру процесі автоматтандырылды.
Азаматтардың сұраныстарын өңдеу уақытын қысқарту мақсатында мемлекеттік ақпараттық жүйелер белсенді қолданылады. Бұл шара шетелдегі Қазақстан азаматтарының паспортын ресімдеу мерзімін, Қазақстан азаматтығын, отбасылық жағдайын және басқа да сұраныстарды растауды 3 айдан 1,5 айға дейін қысқартуға мүмкіндік берді. "Vmp.gov.kz" визалық-көші-қон порталы арқылы елге оралуға арналған куәлікті ресімдеу процесін автоматтандыру бойынша жұмыс жүргізіп жатыр. 2023 жылғы қазандағы жағдай бойынша АХАЖ ақпараттық жүйесіне 85 шет елдердегі мекеме, ХҚКО интеграцияланған ақпараттық жүйесіне – 66, шет елдердегі мекемелерде құжаттау жөніндегі тіркеу пунктіне – 22 қол жеткізе алады.
"Қазақстанның 66 шет елдердегі мекемелерінде Қазақстан азаматтарына ыңғайлы болу үшін ЭЦҚ беру және "электронды үкімет" порталының барлық қызметіне қол жеткізу жүзеге асады. Қазір осы қызметке қосымша 22 консулдық мекемені қосу бойынша белсенді жұмыс істеліп жатыр. "Ұлттық Ақпараттық Технологиялар" АҚ бірлесіп консулдықтарға баруды жоспарлау және "адамдар кезегінің" қолайсыздығын болдырмау үшін онлайн-брондау сервистері әзірленді. Бұл сервис еліміздің 84 шет елдердегі мекемелерінде жұмыс істейді. Сонымен қатар "egov.kz" порталында консулдық қызметтер бөлімі құрылып, бұл электронды түрде қызмет көрсетуге (өтінімдерді жіберуге), кез келген кезеңде өтінімді өңдеуді бақылауға мүмкіндік береді", - делінген ҚР СІМ мәлімдемесінде.
Азаматтардың өтініштерін "е-Өтініш" порталы арқылы тікелей шетелдегі мекемелерде қарауға мүмкіндік берілді. Бұл өтініш берушілерге жауап дайындау уақытын қысқартады. Бүгінде порталға 31 шетелдік мекеме қосылған. Биыл қазан айының соңына қарай барлық қалған шетелдік мекемені қосу жоспарланып отыр.
