Ерлан Сайыров өз сөзінде Мемлекет басшысының айтқанын мысалға келтірді.
"Президент Қасым-Жомарт Тоқаев әрқашан: "Біздің барлық реформаларымыз азаматтардың өмір сүру деңгейі мен сапасын арттыру үшін жүргізіліп жатыр" деп айтады. Алайда, үкімет қабылдаған шараларға қарамастан, халқымыздың әл-ауқаты жақсарып жатқан жоқ", - деді депутат.
Ол Ұлттық статистика бюросының мәліметтеріне сүйеніп, өз сөзіне дәлел келтірді.
"Ұлттық статистика бюросының мәліметтеріне сүйенсек, жан басына шаққандағы кіріс 112 мың теңге, оның 98 мың теңгесі тек қана азық-түлік, киім-кешек, коммуналдық қызметті төлеуге кетеді. Бюроның деректері бойынша, күріштің бағасы 31,3 пайызға, жұмыртқа 16,9 пайызға, сары май мен сүт өнімдерінің бағасы 12 пайызға өскен. Ал коммуналдық қызметтер орташа алғанда 25 пайызға қымбаттаған. Бұл жағдай азаматтардың шығынын арттырып, кірістерін төмендетіп жібергендігі анық. "Баға қайда кетіп барасың?" деп жыламсырайтын жағдайға да жеттік. Осыған қарамастан елімізде ең төменгі жалақы екі жылдан бері 85 мың теңгеден көтерілмей тұр", - деді Сайыров.
Осылай деген депутат мәселені шешу үшін мынандай шараларды ұсынды:
- Ең төменгі жалақы мөлшерін индекстеуді;
- жұмыссыздықтан сақтандыру сомасын арттыру арқылы ең төмен жалақы алатын адамдардың сақтандыру жүйесін жетілдіру;
- өңірлік әкімдіктер жергілікті тұрғындарға азық-түлік қауіпсіздігін қамтамасыз ету бағытындағы шараларды қолға алуы тиіс;
- әкімдер өңірлік ауыл шаруашылық өнімдерін жергілікті нарыққа қажетті мөлшерде жеткізілуін қамтамасыз етуі қажет;
- ауылшаруашылық өнімдеріне берілетін мемлекеттік төлемдерді уақытылы әрі қажетті сомада толық төленуін қамтамасыз ету қажет.