Қарапайым сөзбен айтқанда, полиэтилен пакеттерінің баламасын жасау арқылы қоршаған ортаны ластанудан қорғап, әлемдік мәселені шешуге ұмтылып жатыр. Полиэтилен пакеттері ғасырлар бойы биологиялық түрде ыдырамайды. Осылайша қоршаған орта тұрақты түрде ластана береді.
Мәселенің өзект екенін түсінген Нариман Қайырбеков мектепте оқып жүріп, осы мәселені шешу жолдары туралы ойланған екен. Қазір жас ғалым тақырыпты толыққанды зерделеу мен эксперименттік зерттеулер сатысында.
"Крахмал немесе целлюлозадан биоматериал жасауға тырысамын. Қолданғаннан кейін оларды ыдырату үшін суда еріту жеткілікті. Қазір материалдың икемділігімен жұмыс істеп жатырмын. Менің арманым - Қазақстан өндірісінде биологиялық ыдырайтын өнімді жасап шығару", - дейді Нариман.
Бүгін ЖОО ғалымы ҚР Ғылым және жоғары білім министрлігінің Ғылым комитетіне грант қаржыландыру конкурсына қатысуға өтінім берген. Жас ғалым мемлекеттен қаржылай қолдау алған жағдайда жобаны толықанды жүзеге асырмақ.
