Жергілікті әкімдік осы күнге дейін түрлі сылту айтып, халыққа уәде беруден аспай келеді. Әбден титықтаған тұрғындар тіпті су тартуға қажет құбырды да өздері тауып дайындап қойған. «Әкімшілікке қандай көмек керек, беруге дайынбыз. Тек тіршілік нәріне қолымыз жетсе болғаны» -дейді.
Жүйенің негізгі құбырларын құрылыс жүргізгендер қалай-болса солай жерге көміп кете барған. Тексеру нәтижесінде ол тіпті су тарту үшін арналмағандығы анықталған, деп жазады qazaqstan.tv.
"5 жыл бойы салынған мемлекеттің қаражаты, игерілген 200 млн теңге жердің астында керексіз болып жатыр. Арнайы экспертиза шақырыпты, тексеруге жіберу нәтижесінде бұл құбырлардың мүлдем жарамсыз екендігі жайлы қағаз қолымызда бар." Талғат Төлеген, Қопа ауылының тұрғыны
Аудан әкімшілігі шығын болған қаржыны өндіріп алу үшін, жұмысын шала атқарған мердігер компаниямен соттасқан. Ол арада су тарту жобасының құны да бірнеше есе қымбаттап кеткен.
"Бастапқы бағадан, 2018 жылғы бағадан 459 миллион теңгеге қымбаттап отыр. Жалпы соммасы 774 миллион теңге қаражат болады. Маусым айынан бастап әрі қарай құрылысты жалғастырып, ауа райына байланысты биылғы жылдың аяғына дейін толықтай аяқтаймыз деген жоспарымыз бар." Медет Тәтенов, Аягөз ауданы әкімінің орынбасары
«Сәл ғана шыдау қалды»-деп мамандар халықты сабырға шақыруда. Сенсек, су жүйесін тарту жобасы қазір мемлекеттік сараптамадан өтіп, қажет қаржы көлемі өзгертіліп жатыр. Бірақ, осыған дейін талай уәдені естіп келген қопалықтар, кезекті рет алданып қалмасақ болғаны дейді.
