Жиынға қатысушылар кен орнындағы өртті сөндіру бойынша бірқатар ұсыныстар айтты. "Бозашы мұнай" ЖШС бас геологы Александр Касьяненко ұңғыманың шұңқырын ауыр бұрғылау ерітіндісімен толтыруды немесе ұңғымаға қосымша бүйірлік бұрғылауды ұсынды.
Сурет: Маңғыстау облысы әкімдігінің баспасөз қызметі
Жиын барысында қатысушылар апатты жоюдың түрлі нұсқаларын ұсынды, соның ішінде газ қысымының төмендеуіне байланысты өрт өздігінен жойылуы мүмкін деген пікір де айтылды.
"Газдың қысымы өздігінен төмендеп, өрттің өзі басылғанша күтуге уақыт жоқ, өртті сөндірудің алгоритмі шұғыл түрде жасалуы керек. Барлық жауапты адамдар тартылуы керек. Алгоритмде нақтылану керек." Сала ардагері Балтабек Қуандықов
Жиында облыс әкімі кен орнындағы өрт қауіпсіздік шараларын сақтамау салдарынан туындауы мүмкін екенін қадап айтты.
"Ұңғымаға түсетін газдың көлемі мен қысымын анықтап, кен орнындағы өртті жою бойынша жедел іс-шаралар жоспарын әзірлеу қажет. Жоспар жобасын кідіріссіз зерделеп, сауатты мамандар бірауыздан мақұлдауы керек. Жобаны әзірлеу барысында жедел шара қолдану үшін барлық мердігерлер мен жауапты мамандарды тарту қажет". Нұрлан Ноғаев
Жиыннан кейін облыс әкімі бастаған жұмыс тобы Оңтүстік Қаратұрын кен орнының аумағын аралады.
Сурет: Маңғыстау облысы әкімдігінің баспасөз қызметі
Сарапшылардың алдын ала болжамы бойынша, техногендік апаттың ықтимал себебі ұңғыманы бұрғылау бойынша құрылыс жұмыстары кезінде ұңғыма сағасындағы жарылудың алдын алу қондырғысының қысымының төмендеуі болып табылады.
"Республикалық әскерилендірілген авариялық-құтқару қызметі" ЖШС Маңғыстау филиалының бөлімшелері мен өртке қарсы қызмет апат орнындағы өртті жоюға толық дайындық кезеңінде. Алайда, қазіргі уақытта ұңғыма сағасынан газ-су қоспасының ұзақ уақыт атқылауы және диаметрі шамамен 15 метр, тереңдігі 2-3 метр кратердің пайда болуына байланысты арнайы ұңғымаға өрт сөндіру құралдарымен жақындау және пайдалану мүмкін емес. Маңғыстау облысы әкімдігінің баспасөз қызметі
Маңғыстау облысы Төтенше жағдайлар департаментінің мәліметінше, өрт орнына 33 техника мен жеке құрамның 89 адамы жұмылдырылған, олар біріктірілген өрт сөндіру тобы мен көмекші құрал-жабдықтармен, сондай-ақ жалынды сөндіру үшін арнайы техникамен жабдықталған. Күштер мен құралдар кезекшілікте тұр.
9 маусым күні сағат 03:25-те «Қаратұрын Южный» кен орнында бұрғылау құралын көтеру нәтижесінде газ-су қоспасы бөлініп, ол No303 ұңғымада ашық газ фонтанына айналды. Маңғыстау облысы Төтенше жағдайлар департаменті баспасөз қызметінің хабарлауынша, жалынның биіктігі 10 метрге жеткен.
