Боралдай тас жолының Алатау ауданындағы Барыс көшесінен Жаужүрек көшесіне дейінгі бөлігі 5 шілдеден 3 тамызға дейін жабылады, деп мәлімдеді Алматы қаласының энергетика және сумен жабдықтау басқармасы.
Шектеу 3,5 шақырым су құбыры мен 2,8 шақырым кәріз желісін тарту жұмыстарына байланысты қойылып отыр. Коммуникация құрылысы аяқталғанда су құбыры мен кәріз жүйесінің үздіксіз жұмысы Алатау өңірінің 2500 тұрғынын қамтамасыз етеді.
Барлығы 2023 жылы қала билігі 20 нысанда 108,4 шақырым су құбыры және кәріз желісін (81,1 шақырым су құбыры және 27,3 шақырым кәріз) салуды жоспарлап отыр. Бұл халықтың орталықтандырылған сумен қамтамасыз етілуін 99,2 пайызға дейін арттырады.