Ұшақтың құлау сәтін және оқиға орнындағы бейнероликтерді желіде куәгерлер тарата бастады.
Baza Telegram арнасы траекторияны жариялады:
Қатты соққыдан кейін ұшақ жарылып артынша өртке оранды. ҚР ТЖМ хабарлағандай, оқиға орнына жеке құрамнан 52 адам және 11 бірлік техника барды.
Сонымен қатар, тірі қалғандар бар екендігі туралы алдын ала мәліметтер пайда болды.
Сағат 11: 10-да "Қазаэронавигация" РМК-дан ақпарат келіп түсті: Баку-Грозный бағыты бойынша келе жатқан "Эмбрайр190" AHY8243 ұшағы Ақтау маңында құспен соқтығысып, артынша рульдік басқарудың бұзылуына байланысты апатты жағдайды жариялады.
ҚР Денсаулық сақтау министрі Ақмарал Әлназарова ведомство зардап шеккендерге көмек көрсету үшін шұғыл түрде санитарлық авиация борттарын дайындағанын хабарлады.
"Қазір біз мамандарды, травматологтарды, нейрохирургтерді және тағы басқа дәрігерлерді жіберу үшін санитарлық авиацияның рейсін дайындадық, қажет болған жағдайда оны алып кететін боламыз", — деді министр.
Кейінірек желіде жолаушылардың тізімі пайда болды. Тіркелгендердің көпшілігі әзірбайжандар, сондай-ақ, Қазақстан, Ресей, Тәжікстан және Қырғызстан азаматтары бар екендігі анықталды.
Сурет: Telegram/bazabazon
Көлік министрлігінің дерегінше, бортта алты қазақстандық болған.
Полиция басқармасының қызметкерлері "Абайсызда екі немесе одан да көп адамның өліміне әкеп соққан көлік құралын пайдалану кезінде қауіпсіздік ережелерін бұзу" бабы бойынша сотқа дейінгі тергеу амалдарын бастады.
Артынша желіде құтқару сәтінен бейне тарады.
Кейінірек Росавиация Ақтаудағы ұшақ апатына қатысты пікір білдірді.
"Алдын ала: ұшақ бортындағы төтенше жағдайға байланысты құстармен соқтығысқаннан кейін оның командирі балама аэродромға "баруға" шешім қабылдады — ол Ақтауды таңдады".
Осы арада қайғылы оқиғаның себеп-салдарын тексеру үшін Үкіметтік комиссия құрылды. Комиссия құрамына Премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.
Соңғы ақпарат бойынша Ақтауда ұшақ апатынан аман қалғандар саны 28 адамға жетті.
Мұнымен қоса, ТЖМ деректерді жаңартты: құлаған ұшақ бортында 69 адам болған.