Таратылған ақпаратқа сүйенсек, келісімшарт бойынша қызмет атқару кезінде әскери қызметші жабық әскери қалашықта қызметтік тұрғын үймен қамтамасыз етілген.
"Бұл тұрғын үй жекешелендіруге жатпайтындықтан, 2022 жылы әскери бөлімнің бұйрығы негізінде оған 33 млн теңге өтемақы төленген. Ол оған ауылдан үй сатып алған. Кейін әскери бөлім өтемақы төлеу туралы бұйрықтың күшін жойып, оны өндіріп алу үшін сотқа талап қоюмен жүгінген. Жергілікті соттар жауапкерден мемлекет пайдасына 33 млн теңге өндіріп алып, әскери қызметшінің жекешелендіру құқығын жүзеге асырғанын көрсетіп, оны ақшалай өтемақы алу құқығынан айырған",- делінген ақпаратта.
Жоғарғы Сот әскери қызметші біржолғы ақшалай төлем алу құқығынан айырылмағандықтан, әскери бөлімнің талап қоюын қанағаттандырудан бас тартып, сот актілерінің күшін жойды.
Үкімет бекіткен Ережеге сәйкес, тұрғын үй өтемақысын төлеу әскери қызметші мұқтаждар тізімінде болған, тиісті құжаттары бар және өтемақы төлеу туралы комиссия оң шешім қабылдаған жағдайда біржолғы аудару арқылы жүзеге асырылады.
Жауапкер тұрғын үйге мұқтаж деп танылғаны анықталды.
"Есеп беру кезінде оның әскери қызметі күнтізбелік есепте 20 жылдан астам болған. Әскери қызметкер жабық қалашықта тұрған, оның және отбасы мүшелерінің баспанасы болмаған. Ол алты адамнан тұратын отбасына ақшалай өтемақы алған: әйелі (ол да әскери қызметші) және төрт баласы бар. Бұл қаражат бір үй сатып алуға жұмсалған".ҚР Жоғарғы соты
Сондай-ақ, Мемлекеттiк тұрғын үй қорынан тұрғын үй бiр адамға кемiнде 15 шаршы метр және 18 шаршы метрден артық емес, бiрақ 1 бөлмелi пәтерден кем емес мөлшерде берiлетіндігі атап өтілді.
"Әскери қызметкер 2014 жылы 15,9 шаршы метрлік бір бөлмелі пәтерді жекешелендіріп, оны бірден анасына сыйға берген. Демек, 6 адамнан тұратын отбасына арналған бұл тұрғын үй алаңы стандарттарға сәйкес келмейді және өтемақы төлеу кезінде әскери қызметші нақты тұрғын үйге мұқтаж адам мәртебесін жоғалтпаған",- делінген ақпаратта.
Жоғарғы сот жекешелендіру құқығын бұрын жүзеге асырған жағдайда ақшалай өтемақы төлеуді шектеуге қатысты өзгерістер 2022 жылғы 29 сәуірден кейін енгізілген, ал ақшалай өтемақы төлеу туралы бұйрық 2021 жылғы 23 желтоқсанда шығарылғанын мәлімдеді.
"Өтемақы төлеу туралы бұйрық шығарылған кезде қолданыста болған нұсқада мұндай шектеу белгіленбеген". ҚР Жоғарғы соты
Бұған дейін Алматыда полицияның тағы бір тонаудың бетін ашқандығы хабарланған болатын.