Қазақстан Республикасының аумағына үшінші елдерден және Еуразиялық экономикалық одақ елдерінен көліктің барлық түрлерімен жаңа піскен тауық жұмыртқасын әкелуге алты айға тыйым салу енгізілсін, делінген мәтінде.
Ерекшелік жұмыртқаның Қазақстан Республикасының аумағы арқылы транзиті, сондай-ақ олардың ЕАЭО-ға мүше бір мемлекеттің аумағынан ЕАЭО-ға мүше басқа мемлекеттің аумағына – Қазақстан аумағына тасымалдануы болып табылады.
Бұйрық 9 сәуірден бастап күшіне енеді.
Ауыл шаруашылығы министрлігі жұмыртқаны импорттауға уақытша тыйым салу көктемгі-жазғы кезеңде отандық өндірушілерді қолдау үшін белгіленгенін түсіндірді.
Бұл кезеңде, әдетте, жұмыртқаға сұраныс төмендейтіндіктен, нарық қажеттілігі өнеркәсіптік өндіріс пен тұрмыстық өнімдермен толығымен жабылады. Бұл жұмыртқа бағасының төмендеуіне әкеледі, бұл құс фабрикаларының қызметіне және өндірістің рентабельділігіне кері әсерін тигізеді.
Сонымен қатар, осы кезеңде жұмыртқаның сақтау мерзімі қысқарады, ал технологиялық ерекшеліктерге байланысты жұмыртқа өндірісінің көлемі азаймайды, бұл қоймаларда қордың артық болуына әкеледі.
Жоғарыда аталған факторларды ескере отырып, Сыртқы сауда саясаты жөніндегі ведомствоаралық комиссия Қазақстан Республикасының аумағына тауық жұмыртқасын әкелуге уақытша шектеу шараларын белгілеудің орындылығын мақұлдады, деп хабарлады ведомстводан.