Оның айтуынша, қазіргі уақытта борышкерлерді еңбекпен қамту процесін автоматтандыру бойынша жұмыс жүргізілуде – бұл үшін атқарушылық іс жүргізу жүйесін Еңбек министрлігінің деректер базасымен біріктіру жоспарланып отыр. Бұл олардың әлеуметтік мәртебесі мен жұмыспен қамтылуы туралы ақпаратты жедел алуға мүмкіндік береді.
"Сондай-ақ, Яндекс, InDriver және басқа да сайт-агрегаторлар арқылы жұмыс істейтін борышкерлердің жасырын табыстары анықталатын болады. Сонымен қатар, кірістің басқа да көздерін анықтап, оларды қарызды өндіру үшін пайдалану мүмкіндігі зерттеліп жатыр. Конституциялық соттың нормативтік қаулысында кәсіпкерлікпен айналысатын адамдардан алимент есептеу және өндіру заңнамасын жетілдіру мәселесін қарастыру ұсынылды. Осы қаулыны орындау шеңберінде "Неке (ерлі-зайыптылық) және отбасы туралы" Кодекске түзетулер әзірленді, оған сәйкес алимент көлемі жеке кәсіпкерлерге қатысты сотпен нақты ақшалай мөлшерде белгіленетін болады", – деді Ерлан Сарсембаев.
Ол бұл заңнамалық түзетулер қазіргі уақытта депутаттардың қарауында екенін атап өтті.
"Сонымен қатар, алимент өндіру мәселелерін жетілдіру Сенат қабырғасында да қаралуда. Сот әкімшілігі, Әділет, Мәдениет және ақпарат, Еңбек және халықты әлеуметтік қорғау, Оқу-ағарту министрліктері, Жеке сот орындаушыларының республикалық палатасы және қоғам өкілдері қатысатын жұмыс тобы құрылды. Жұмыс тобы шеңберінде көтерілген мәселелер бойынша заңнамалық шешімдер әзірленуде", – деді министр.
Бұған дейін Қазақстандағы некенің жартысы ажырасумен аяқталып жатқандығы жайлы жазған болатынбыз.