Көлік полициясы департаментінің баспасөз қызметінің хабарлауынша, сотта адвокат Дүйсеков айыпталушы Баратовқа тағылған қылмыстық құқықбұзушылықтың саралануымен келіспейтінін мәлімдеген. Осыған байланысты қылмыстық іс прокурорға қайта жолданған.
"Қосымша сотқа дейінгі тергеп-тексеру нәтижесі бойынша Машрапбек Баратовтың әрекетіне берілген құқықтық баға өзгеріссіз қалды", - деді көлік полициясы департаменті.
Сондай-ақ, сотқа дейінгі тергеу барысында әуежай қызметкерін құтқарып қалған Мұса Әбдірайымов жәбірленуші деп танылды.
Қылмыстық іс бойынша тергеу аяқталып, іс қайтадан сотқа жолданды.
2025 жылғы 7 наурызда Алматы әуежайында ер адам қолына пышақ алып, бойжеткенді кепілге алған. Оны сол маңнан өтіп бара жатқан азамат — Мұса Әбдірайымов құтқарып қалған.
67 жастағы күдіктіге қатысты сот 7 сәуірде басталған. Оған үш бірдей бап бойынша айып тағылды:
- ҚР ҚК 261-бабы 2-бөлімі 4-тармағы – "Кепілге алу" (7 жылдан 12 жылға дейін бас бостандығынан айыру, мүлікті тәркілеумен);
- ҚР ҚК 293-бабы 3-бөлігі – "Қару қолдану арқылы жасалған бұзақылық" (3 жылдан 7 жылға дейін бас бостандығынан айыру);
- ҚР ҚК 273-бабы – "Террористік акт туралы көрінеу жалған хабарлау" (5000 АЕК-ке дейін айыппұл немесе 5 жылға дейін бас бостандығынан айыру).
Сот процесінің басында прокурор Бертаев сотқа дейінгі тергеу мерзімінен бұрын аяқталғанын, өйткені айыпталушы тергеу барысында дәлелдерге қарсы болмағанын айтып, істің қысқартылған тәртіпте қаралатынын мәлімдеген. Алайда кейін сотта жауап берген Машрапбек Баратовтың өзі кепілге алу немесе террористік әрекет жасау ниеті болмағанын айтқан. Соның нәтижесінде сот істі прокурорға кері қайтарған.