Almaty.tv мәліметінше, зардап шеккендер шұғыл түрде ауруханаға жеткізілген. 46 жастағы ер адамның денесінің 80%-ын күйік шалған. Оның тыныс алу жолдары зақымданып, беті, екі қолы мен денесі күйген. 23 жастағы әріптесінің де қолдары, аяқтары мен денесін күйік шалып, қазір дәрігерлердің бақылауында жатыр. Мамандар өрттің шығу себебін анықтап жатыр.
Алдын ала мәлімет бойынша, оқиға қорғаныш орман екпелері дистанциясының қызметкерлері бөшкедегі отынды басқа ыдыстарға құйып жатқан кезде болған. Бір сәтте жанармай тұтанып, жалын жұмысшыларға шарпыған.
"Қазір комиссия құрамы бекітілді. Мемлекеттік еңбек инспекторының төрағалығымен жазатайым оқиғаны тергеп-тексеру басталады", – деді Мемлекеттік еңбек инспекциясы комитетінің облыстық департаменті басшысының орынбасары Талғат Исқарин.
Тергеп-тексеру 10 жұмыс күні ішінде жүргізіледі. Ведомство өкілдерінің айтуынша, оның қорытындысы бойынша оқиғаның себептері туралы тұжырым жасалады.
Көкшетауда тағы бір жұмысшы зардап шекті. Ол баспалдақ аралығындағы ашық кеңістікке құлап, бірнеше ауыр жарақат алған. Еңбек инспекциясы оқиғаның мән-жайын анықтап жатыр.