Батыс Қазақстан облысы Бәйтерек ауданында медициналық мекеменің алдында тұрған жедел-жәрдем қызметінің көлігін айдап кеткен 30 жастағы адам ұсталды, деп хабарлайды zakon.kz.
Polisia.kz мәліметі бойынша, оқыс оқиға шамамен бүгін таңғы сағат 04:00 шамасында орын алды.
Ер азамат аяғын жарақаттап алып, үйіне жедел-жәрдем шақырған. Медицина қызметкерлері науқасты ауруханаға жеткізгеннен кейін тиісті ем-дом шараларын көрсетіп, үйіне баруына рұқсат еткен. Ал 1990 жылғы П. есімді азамат үйіне жету үшін медициналық мекеменің алдында тұрған жедел-жәрдем көлігін айдап кеткен. Алайда аурухананың шыға берісінде 30 жастағы азамат сол ауылдағы мектептің қоршауына соғылған. Ол аяғындағы жарақатына қарамастан қоршаудан секіріп, оқиға орнынан қашып кеткен.
Қазіргі таңда материалдық шығын соммасы анықталуда. Ал жедел жәрдем көлігін айдап кеткен азамат ұсталды. Айта кету керек, жігіт масаң күйде болған.