Таразда психикалық дертке шалдыққан ер адам баланы соққыға жықты, деп хабарлайды Zakon.kz.
Облыстық полицияның мәліметінше, оқыс оқиға 20 қазанда орын алды.
Тараз полициясына бір қыз хабарласып, Абай даңғылында орналасқан медициналық клиниканың жанында кәмелетке толмаған баланы бөтен адамның ұрып жатқанын хабарлаған. Аталған фактіге сәйкес, ҚР Қылмыстық кодексінің 293-бабының 1-бөлігі бойынша сотқа дейінгі тергеу басталды, - деді облыстық ПД.
Полиция қызметкерлері баланы ұрған Жамбыл ауданының тұрғыны екенін анықтап, оны бөлімшеге апарды.
Тергеу барысында күдіктінің психикалық ауытқушылығы бары белгілі болды. 2018 жылдан бастап облыстық психиатриялық ауруханада "шизофрения параноидты, үздіксіз ағым, кататониялық синдром" диагнозымен есепте тұр. Екінші топтағы мүгедек болып табылады, - деп атап өтті баспасөз қызметі.
Күдікті сот-психиатриялық сараптама тағайындау үшін психиатриялық ауруханаға жатқызылды.
Баланың денсаулығына келтірілген зиянның ауырлығын бағалау үшін тергеу органдары сот-медициналық сараптама тағайындады.
