Сыбайлас жемқорлыққа қарсы қызмет Атырау облысы әкімінің орынбасарына қатысты тергеуді бастады, деп хабарлайды Zakon.kz.
Бұл іс бойынша әкім орынбасарымен бірге Атырау облысы мәдениет, мұрағат және құжаттама басқармасының басшысы да күдікті деп танылды.
Олар Атырау қаласында Абай ескерткішін жасау және орнату бойынша мемлекеттік сатып алу шартын жасағаны үшін ЖШС басшысынан 145 млн теңге сомасында алдын ала сөз байласу арқылы бір топ болып пара алды деген күдікке ілінді. ҚР Сыбайлас жемқорлыққа қарсы іс-қимыл агенттігі
Агенттіктің мәліметінше, күдікті адам ұсталып, Атырау қалалық ПБ уақытша ұстау изоляторына тоғытылды. Өзге ақпараттар тергеу мүддесіне сай жария етуге жатпайды.
Айта кетсек, Бақытгүл Хаменова облыс әкімінің орынбасары лауазымына былтырғы 13 наурызда келген. Оған дейін «Нұр Отан» партиясы атынан Парламент Мәжілісінің VI шақырылымының депутаты болды. Өңірлік мәдениет, мұрағат және құжаттама басқармасының тізгіні 2020 жылдың маусым айынан бастап Ақылбек Рысқалиевтің қолында.
