Елорда әкімдігінің мәліметінше, оңтүстік-батыстан солтүстік-шығысқа ойыса соққан желдің түнде және таңертең екпіні 15-18 м/с болуы мүмкін. Осыған байланысты Астана қаласы ТЖД қатты жел мен бұрқасын кезінде жарақат алмас үшін азаматтарға қауіпсіздік шараларын сақтауды ұсынды:
- "112" құтқару қызметінен ауа райының нашарлауына байланысты дауылды ескерту туралы SMS-хабарлама алған кезде, оған дұрыстап ден қойыңыз;
- ауа райы жағдайы мен жолдардағы көлік қозғалысының шектеулері туралы ақпаратты елеусіз қалдырмаңыз;
- дауылды ескерту жарияланған кезде, әсіресе қараңғы уақытта ұзақ сапарға шығудан бас тартып, жаяу жүруден аулақ болыңыздар;
- қыс мезгілінде сақтық шараларын сақтаңыз;
- жеке көлікпен жолға шықпаңыз. Егер қажет болса, қоғамдық көлікті пайдаланыңыз және маршрутыңызды алдын ала жоспарлаңыз;
- көшеде абай болыңыз. Боран мен бұрқасын айналаны көруді қиындатуы мүмкін, жолдар тайғақ болады. Жылы киім, тайғақтан қорғайтын аяқ-киім киіңіз;
- жылыту жүйесін тексеріңіз. Үйіңізде жылыту желісі дұрыс жұмыс істейтініне және отын жеткілікті екеніне көз жеткізіңіз;
- Көшеде ұзақ тұрмаңыз, аяз бен үсік шалу қаупі жоғары.
Төтенше жағдайлар туындаған кезде "101" және "112" нөміріне хабарласыңыздар!
Бұған дейін Астанада қолайсыз ауа райына байланысты әуе рейстері кешігіп жатқанын жазғанбыз.