Сот мәліметтеріне сәйкес, оқиға 2026 жылғы 10 мамырда сағат 02:00 шамасында болған. Жәбірленуші сотталушының жұбайының фотосуреттеріне "Ұнайды" белгісін қойғаннан кейін екі ер адам арасында жанжал туындаған.
Жанжал кезінде ер адам алдын ала дайындап қойған жиналмалы пышағын шығарып, жәбірленушіні бірнеше рет пышақтаған. Осыдан кейін оқиға орнынан қашып кеткен.
Салдарынан жәбірленушінің ішіне пышақ кіріп, ішкі ағзалары зақымданған. Сот келтірілген зиянды денсаулыққа келтірілген ауыр зиян деп бағалады.
Сотталушы кінәсін толық мойындап, өкініш білдірген және жәбірленушіден кешірім сұраған. Мемлекеттік айыптаушы оған үш жылға бас бостандығынан айыру жазасын тағайындауды сұрады.
"Сот ер адамды кінәлі деп танып, үш жылға бас бостандығынан айыру жазасын тағайындады. Алайда тағайындалған жазаны шартты деп есептеу туралы шешім қабылдады. Сынақ мерзімі үш жыл болып белгіленді", – деп хабарлады БҚО сотының баспасөз қызметі.
Осы кезеңде ер адамға пробация қызметіне хабарламай тұрғылықты жері мен жұмыс орнын өзгертуге, басқа елді мекендерге баруға және алкоголь сатылатын орындарға кіруге тыйым салынған. Сондай-ақ ол сағат 22:00-ден 06:00-ге дейін үйінде болуға және қасақана жаңа құқық бұзушылықтар жасамауға міндетті.
Үкім заңды күшіне енді.
Бұған дейін әйелдің жаңылысып айтқан сөзі оның екі апта ауруханада жатуына, ал бірге тұратын ер адамның үш жарым жылға бас бостандығынан айырылуына себеп болғанын жазған едік. Петропавл тұрғыны сүйіктісі өзін басқа адамның атымен атағаннан кейін оны аяусыз ұрып-соққан.