Оңтүстік Қазақстан облысының әкімі "Рухани жаңғыру" бағдарламасын жүзеге асыруға арналған алты арнайы жобаның бірі болып саналатын "Қазақстанның киелі жерлері" жобасының өңірлік шаралар жоспарын бекітті, - деп хабарлайды Zakon.kz ОҚО баспасөз қызметіне сілтеме жасап.
Қасиетті жерлердің тізімін жасауға арнайы жұмысшылар тобы құрылды. Киелі жерлердің өңірлік карта жобасы жасалды.
Облыс бойынша 104 қасиетті және киелі жер «Қасиетті Қазақстан» ғылыми-зерттеу орталығына берілді.
Қазіргі кезде «Қасиетті Қазақстан» ғылыми-зерттеу орталығының сарапшылары республика бойынша 100 нысан (қасиетті және киелі жерлер) қалыптастырды, олардың 24 нысаны - Оңтүстік Қазақстан облысында. Бұл көрсеткіш басқа облыстармен салыстырғанда екі есе көп.
Оған қоса, өңірдегі киелі жерлер тізіміне қосылған, экспедиция болған Сайрам ауданындағы тарихи Ханқорған қалашығында археологтар мен сәулетшілердің қатысуымен біріккен отырыс өтті.
Енді Оңтүстік Қазақстан облысындағы Ханқорған қалашығы болашақта толық археологиялық қазба жұмыстары, жаңғырту, табиғатты қорғау жұмыстары жүргізілетін ашық аспан астындағы музейге айналады.
