Қызылорда өңірінде кітап оқуға қызығушылықты оятудың тың әдісі қолға алынды. Қызылорда облысы бойынша Zakon.kz тілшісі хабарлайды. Тың болатын себебі, белгілі қазақ жазушыларының шығармаларындағы Сыр өңіріне қатысты қызықты тұстар ықшамдалып, жүйеленіп, оқырманға ұсынылады. Облыстық тілдерді оқыту орталығының мамандары 10 кітапшаны дайындап, баспаға жолдады.
Одан бөлек, "Қорқыттың даналық сөздері" атты кітаптың қазақ, орыс тілдеріндегі нұсқасы дайын. Қазір ол ағылшын тіліне аударылып жатыр. Кітапқа АҚШ пен Еуропа мемлекеттерінің архивтеріндегі тың дүниелер топтастырылған. "Рухани жаңғыру" бағдарламасы аясында жергілікті тарихи-мәдени ескерткіштердің телеатласы, аймақ тарихының электронды оқулығы жарық көреді.
Қызылордалықтардың 99,4%-і – қазақ, 70,8%-і – орыс, 13,6%-і ағылшын тілдерін біледі. Үш тілді қатар меңгергендердің үлесі – 12,2%. Есепті кезеңде мемлекеттік тіл саясатын жүзеге асыру бағытында аймақта біршама жұмыс атқарылды. Оның ішінде қазақ әліпбиін латын графикасына көшірудің негізгі қағидаларын түсіндіру мақсатында 80-ге жуық шара ұйымдастырылып, ақпарат құралдары, әлеуметтік желілер арқылы кеңінен насихатталды. 626 адам – қазақ, 319 адам – орыс, 635 адам ағылшын тілдері бойынша курстардан өтті.
Жыл соңына дейін Сыр топырағынан шығып, республикаға танылған азаматтардың басын қосатын дәстүрлі "Туған жерге тағзым" акциясы өтпек.