Болашақта Әзірбайжан Қарабақты Армениядан соғыссыз тартып алады. Қазаққа бұл жағдай үлкен сабақ болуы тиіс, деп пайымдайды қазақ саясаттанушысы Әзімбай Ғали.
Әзімбай Ғали өзінің Facebook–тегі парақшасында былай деп жазды:
Армения Қарабақты басып алып, үлкен бәлеге қалды. Армения – кішкентай мемлекет. Әзірбайжанға қарсы соғысты жалғастыруға қаражат керек, ал ақша жоқ. Оның үстіне, армяндар соғысқысы келмейді. Енді Армения блокадаға ұрынды: ол Түркия, Иран, Әзірбайжанмен шекаралас. Арменияның халқы азайып келеді – туу аз, көшушілер көп, Арменияның халқы ендігі 3 миллионнан да азаюда. Ал Әзірбайжандар саны тез өсіп келеді, 9 миллионнан асты. Әзірбайжан бюджеті мұнаймен қуаттанғаны белгілі. Егер де бұл жағдай жалғаса берсе, Армения жұртшылығы мүлдем азайып, Әзірбайжан соғыссыз Қарабақты алады. Қазаққа бұл жағдай сабақ: соғыспай санымызды көтеру, біздің солтүстік өлкелерде - Солтүстік Қазақстан облысында, Қостанай облысында қазақтың үлесін көтеру маңызды.
