Алматы қалалық Қоғамдық денсаулық басқармасының бастығы Камалжан Надыров мегаполистегі коронавирус ауруына шалдыққан медицина қызметкерлерінің арасында қайтыс болғандардың бар-жоғын айтты, деп хабарлайды zakon.kz.
- Алматыда медицина қызметкерлерінің қызметтік міндеттерін орындау кезінде қайтыс болғандар жоқ. Өкінішке қарай, жедел жәрдем көлігі жүргізушілерінің арасында бізде екі қайғылы жайт тіркелді. Сондай-ақ орталық қалалық клиникалық аурухананың жеделсаты қызметкері де қайтыс болды. Марқұмдардың барлығына 10 миллион теңге көлемінде өтемақы төленеді, - деді Камалжан Надыров.
Коронавирус науқастарды ауруханаға жеткізу жедел медициналық жәрдем қызметі арқылы қатаң түрде жүргізілетіні белгілі.
