Ұлттық қауіпсіздік комитеті 2020 жылғы мамырда "goszakup.gov.kz" мемлекеттік Интернет-ресурсының жұмысын уақытша тоқтатқан "Электрондық мемлекеттік сатып алу" ақпараттық жүйесіне DDos типті кибершабуыл фактісі бойынша қылмыстық істі тергеп-тексеруді аяқтады, деп хабарлайды zakon.kz ҚР ҰҚК баспасөз қызметіне сілтеме жасап.
Көрсетілген кибершабуыл салдарынан жалпы сомасы 164 млрд теңгеге 7901 мемлекеттік сатып алу ауыстырылды.
Жедел-іздестіру іс-шаралары барысында, оның ішінде "ЭҚО" АҚ (электрондық қаржы орталығы) жәрдем көрсетуімен электрондық мемлекеттік сатып алуға қатысу кезінде кейіннен артықшылықтар алу мақсатында мемлекеттік Интернет-ресурсқа кибершабуыл жасаған ҚР азаматы анықталды.
Тергеп-тексеру және жүргізілген компьютерлік-техникалық сараптама нәтижелері бойынша адамның кінәсі толық дәлелденді, қылмыс жасау құралдары алынды.
2020 жылғы 22 желтоқсанда Нұр-Сұлтан қаласы Сарыарқа аудандық сотының шешімімен сотталушы ҚР ҚК 207-бабының 2-бөлігі 1-тармағы "Ақпараттық жүйенің немесе телекоммуникация желілерінің жұмысын бұзу" бойынша кінәлі деп танылып, 3 жыл мерзімге электрондық мемлекеттік сатып алу саласындағы қызметпен айналысу құқығынан айырумен 2 жыл мерзімге бас бостандығын шектеу түрінде жазаланды.
Үкім заңды күшіне енді.