Қытайдағы жер сілкінісінен кейін тағы бір афтершок тіркелді

4 желтоқсан күні кешке Қазақстанның Ұлттық деректер орталығы (KNDC) Қытайда болған жер сілкінісінен кейін тағы бір афтершок болғанын мәлімдеді, деп хабарлайды Zakon.kz.

Орталықтың жедел мәліметіне сәйкес, Астана уақытымен 15:52-де Қытай аумағында жер сілкінісі тіркелген.

"Эпицентр координаттары: солтүстік ендік 41.19°, шығыс бойлық 78.40°. Магнитудасы mpv=4.2, энергетикалық класы K=10.2", - делінген хабарламада.

Афтершок Қазақстан аумағында сезілмеген.

Еске салайық, бүгін, 4 желтоқсанда, сағат 12:45-те Алматыда жер сілкінісі болды. Қалада сезілген жерасты дүмпулерінен кейін қала тұрғындары мен қонақтары кеңселерден, ғимараттардан, сауда орталықтарынан жаппай сыртқа шықты. Метрополитен де уақытша жұмысын тоқтатты.

Жер сілкінісі ошағы Алматыдан оңтүстік-шығысқа қарай 277 шақырым қашықтықта орналасқан. Дүмпулер тек Алматыда емес, Қазақстанның ондаған елді мекенінде сезілді.