"Қытайдан қашқан" екі қазақтың үстінен сотқа дейінгі тергеу басталды
Manas Kaiyrtaiuly (RFE/RL)
ҰҚК шекара қызметі "қазақ-қытай шекарасын кесіп өтіп, Қазақстанға келген" Шыңжаң қазақтары Мұрагер Әлімұлы мен Қастер Мұсаханұлының үстінен сотқа дейін тергеу бастады, деп жазады Азаттық ҰҚК шекара қызметінің баспасөз қызметіне сілтеме жасап.
Шекара қызметінің хабарлауынша, Әлімұлы мен Мұсаханұлының үстінен сотқа дейінгі тергеу Қылмыстық кодекстің 392-бабы 1 бөлігі, яғни "Қазақстан шекарасын заңсыз кесіп өту" бабы бойынша жүріп жатыр.
ҰҚК Мұсаханұлы жылқы ұрлығына байланысты қылмыстық жауапкершіліктен қашып, 2006 жылы 21 маусымда қазақ-қытай шекарасын бұзғанын мәлімдеді. "Сол кезде ол Қытайға қайтарылған" деп мәлімдеді шекара қызметінің баспасөз қызметі.
Шекара қызметі Әлімұлы мен Мұсаханұлына қатысты сотқа дейінгі тергеу халықаралық құқықтар мен Қазақстан заңына сай жүріп жатқанын хабарлады.
30 жастағы Қастер Мұсаханұлы мен 25 жастағы Мұрагер Әлімұлы Дөрбілжің аймағынан жолға шығып, 1 қазанда Қытай шекарасынан өткендерін айтқан. Өздерінің айтуына қарағанда, қазақ-қытай шекарасы аралығындағы бейтарап аумақта бес күндей жүріп, қазанның 6-сы күні Шығыс Қазақсан облысының Зайсан, Шілікті, Маңырақ ауылдарының тұсынан Қазақстанға өткен. Кейін жолай такси жалдап, 10 қазанда қазанда Алматыға "келген".
14 қазанда Алматыдағы адам құқығын қорғау бюросында өткен баспасөз мәслихатында Қастер Мұсаханұлы Шыңжаңдағы лагерьде қамауда отырып шыққанын, ал Мұрагер Әлімұлы сол жақта қысым көргенін айтқан. Баспасөз мәслихатынан кейін оларды шекара қызметінің өкілдері алып кеткен.
