Олимпиадаға дайындық орталығы басшысының пара алу кезіндегі видеосы жарияланды

видеодан алынды

Олар бір кәсіпкерден 6 миллион 625 мың теңге көлемінде пара алды деп күдікке ілінді.

Алматыдағы сыбайлас жемқорлыққа қарсы қызмет пара алды деген күдікпен "Ауыр атлетика бойынша олимпиадаға дайындық орталығы" басшысы мен осы мекеменің бас есепшісіне қатысты сотқа дейінгі тергеуді бастады, деп хабарлайды zakon.kz.

"Олар бір топ адам болып алдын ала сөз байласып, Жамбыл облысындағы оқу-жаттығу жиындарын өткізу үшін қызметтерді мемлекеттік сатып алу туралы келісімшартқа отырғаны үшін сыйақы ретінде кәсіпкерден 6 миллион 625 мың теңге көлемінде пара алды деп күдікке ілінді", - делінген Сыбайлас жемқорлыққа қарсы қызмет таратқан хабарламада.

17 желтоқсанда бұл адамдар ұсталып, Алматы қалалық уақытша ұстау изольяторына қамалды, қазір бұлтартпау шарасына қатысты мәселе қарастырылып жатыр. Сотқа дейінгі тергеу жалғасуда.

Күдіктілерге қатысты соңғы шешімді сот шығарады.