Қарағандының бұрынғы әкімі жаңа лауазымға ие болды
kapital.kz
"Сарыарқа" әлеуметтік-кәсіпкерлік корпорациясында Басқарма төрағасы ауысты. Бұл лауазымға Қарағандының бұрынғы әкімі Нұрлан Әубәкіров тағайындалды, деп хабарлайды zakon.kz корпорацияның баспасөз қызметіне сілтеме жасап.
Оның екі жоғары білімі бар. Е.А. Бөкетов атындағы Қарағанды мемлекеттік университетін "Қаржы және несие" мамандығы бойынша бітірген, Д. А. Қонаев атындағы Гуманитарлық университетін "Құқықтану" мамандығы бойынша тәмамдаған.
Еңбек жолын бюджеттік банктің аға ревизоры болып бастады. Қарағанды облыстық қазынашылық басқармасында, Қарағанды облысы бойынша экономика және кәсіпкерлікті дамыту Бас басқармасында, Қарағанды облысының кәсіпкерлік және өнеркәсіп департаментінде жұмыс істеген.
Қарағанды қаласының Қазыбек би атындағы аудан әкімі аппаратының басшысы, Қарағанды қаласының ТКШ, жолаушылар көлігі және автомобиль жолдары бөлімінің бастығы, Қарағанды облысы әкімі аппараты басшысының орынбасары болды. 2009 жылдан 2010 жылға дейін Қарағанды қаласының Қазыбек би атындағы ауданын басқарды. Содан кейін Қарағанды әкімінің орынбасары болды. 2011 жылдан 2012 жылға дейін Қарағанды қаласының Октябрь ауданының әкімі, 2012 жылдан 2014 жылға дейін Балқаш қаласының әкімі болды. 2014 жылдың маусым айынан 2020 жылдың қыркүйек айына дейін Қарағанды қаласының әкімі қызметін атқарды.
Халел Әкімжанов басқа жұмысқа ауысуына байланысты "Сарыарқа ӘКК" АҚ басқарма төрағасы қызметінен босатылды.
