Емші-бизнесмен Жасан Зекейұлы өз әйелін соттайын деп жүр

9 Қазан 2020, 12:33
Сурет: "Жас-Ай"

Кезінде Қытайдан оралған қандасымыз, сосын елде емші атанып, біраз танылып қалған Жасан Зекейұлы 22 жыл бірге тұрған өзінің әйелін, төрт баласының анасын жеті жыл бойы зар илетіп келеді екен, деп хабарлайды zakon.kz.

Бұл туралы төзімі әбден таусылған Зекейұлының әйелі Гүлия Әлиханқызы өз аузымен әңгімелейді. Әйелдің сөзінше, қырсық Жасан небір қитұрқылықтармен оны адам сияқты ажырасу құқығынан айырып отыр. Сондағысы – ортақ дүние-мүлікпен бөліскісі келмеу. Сол үшін әйелі екеуінің неке туралы куәлігін жарамсыз деп танытуға тырысып жүр екен. Шарасыз әйел соттан, прокуратура мен ІІМ-нен әділдік іздеп шаршады.

Әйелдің сөзінше, Жасан Зекейұлы 2015-ші жылы өз некесін заңсыз деп танитын сот шешімі үшін сотқа өзінің адвокаты арқылы 205 мың доллар пара беріп жіберген. Адвокат болса ол ақшаны өз қалтасына басып, ақыры Зекейұлы адвокатына арызданып, 2018 жылы адвокат сотталып кетеді. Ал Жасанға қатысты пара беру дерегі бойынша қозғалған қылмыстық іс белгісіз себептермен Алматы полициясында жоғалып кетіпті. Бұл ақпарат 2019 жылы прокуратураның ресми жауабында көрсетілген. Содан бері қылмыстық іс табылмай, жолы болғыш Жасанға қатысты тергеу тоқтап қалған.

Жасан Зекейұлы онымен қоймай, өз ісін "жоғалтып" жіберген Алматының Бостандық аудандық полиция бөліміне барып, әйеліне қарсы арыз түсірген. Бұл әйел жалған неке куәлігін жасатты деген шағыммен. Полиция да Жасанның айтағына еріп, Гүлияның үстінен бес рет қылмыстық іс қозғаған. Бесеуі де қылмыс құрамының жоқтығынан тоқтатылған. Бірақ прокуратура істі тоқтату туралы қаулылардың күшін жойып, істі қайта-қайта жаңа тергеуге жөнелте береді екен. Гүлияны соттаймыз деп қорқытып, Жасанға керек кезде полиция келіп, тергеуге алып кетеді.

Мәселен, Гүлия жалған құжат жасады деп, полиция күні кеше тағы да жаңа тергеу бастапты. Бірақ сот салған сұрау бойынша архивтен келген жауап бар, 1992 жылы некенің ресми тіркелгенін растайтын.

Гүлия Әлиханқызы Президент Қасым-Жомарт Тоқаевқа дейін ашық үндеу жолдаған, бірақ әзірге прокуратура да, ІІМ мен сыбайлас жемқорлыққа қарсы агенттік те Жасанның ісіне назарын аударар емес.

Әйелдің арызынан кейін, Nur Otan партиясы праймеризге тіркеліп, депутат боп кете жаздаған Жасанды өз қатарынан шығарып жіберді жуырда. "Алдымен әйеліңмен арадағы мәселені шешіп ал. Депутат болып, мемлекеттің мәселесіне сосын араласасың", деген сияқты оған.

Жасан мен Гүлияның ортақ төрт баласы бар екенін айттық жоғарыда. Туған әкесінің туған анасына жасап жүрген қастандығын сүп-сүйкімді үлкен қызы Ұлпан да түсінбейді.

– Мен әрине, шешемді жақтаймын, дейді ол. – Пара беру туралы істің қалайша жоғалып кеткеніне таңым бар. Сіздер редакцияның атынан Ішкі істер министрлігіне ресми сауал жолдаңызшы, закон деген басылым екенсіз. Шешем әкеммен ажырасып, Жасаннан аулақ жүргісі келеді. Ал әкем бұған жол бермей отыр, шешемді сотпен қорқытып, қысым жасап. Бір жаңалықта "экс-әйелі" деп жазыпсыздар, сол "экс-әйелі" бола алмай жүрген жайымыз бар, – дейді Ұлпан.

Тақырып бойынша: Бизнесмен-дәрігер Жасан Зекейұлын экс-әйелі жамандап жүр


zakon.kz жаңалықтарын оқыңыз
Жазбаларды көрсету

Көп оқылғандар

барлық жаңалықтар

ЖАҢАЛЫҚТАР

қате туралы хабарлау
Қате туралы хабарлау
Қате мәтін:
Түсініктеме:

Маңызды жаңалықтарды білгіңіз келе ме?