"Мені зорлады" деп жалған сөйлеген 19 жастағы ауыл қызы сотталды

2020 жылдың мамыр айында Талдықорған қаласы ПБ Батыс қалалық полиция бөлімінде ҚР Қылмыстық кодексінің 120-бабына сәйкес "Зорлау" дерегі бойынша қылмыстық іс қозғалды, деп хабарлайды zakon.kz Алматы облысы ПД баспасөз қызметіне сілтеме жасап.

Тергеу барысында тергеуші өтініш берушінің жауаптарындағы бірқатар сәйкессіздіктерді анықтады.

Олар анықталған кейбір жайттарға қарама-қайшы келді.

Сараптама қорытындыларымен және басқа да объективті дәлелдермен теріске шығарылды. Өзге біреудің үстінен полицияға арызданған Көксу ауданы Мұқыры ауылының 19 жастағы тұрғынының өз танысына көрінеу жала жапқаны әшкере болды. Тәртіп сақшылары зорлау дерегі бойынша қылмыстық істі қысқартып, көрінеу жалған сөз жеткізу дерегі бойынша ҚР Қылмыстық кодексінің 419-бабына сәйкес қылмыстық іс қозғады.

Сотқа дейінгі тергеу материалдары негізінде осы жылдың қазан айында Талдықорған қалалық сотының үкімімен 19 жастағы қыз кінәлі деп танылып, оған 3,5 жылға бас бостандығын шектеу жазасы тағайындалды.