Тоқаев Түрікменстан президентіне көңіл айтты
Ақорда
Қасым-Жомарт Тоқаев Түрікменстан президенті Гурбангулы Бердымұхамедовке көңіл айту жеделхатын жолдады, деп хабарлайды zakon.kz.
Мемлекет басшысы Қазақстан халқының және жеке өзінің атынан Түрікменстан Президенті Гурбангулы Бердымұхамедовке әкесі Мяликгулы Бердымұхамедовтің қайтыс болуына байланысты көңіл айтты.
"Әкеңіздің жарқын бейнесі жақындары мен барша отандастарының жүрегінде жақсы адам, дана ұстаз және өмірін Отанына қалтқысыз қызмет етуге арнаған шынайы патриот ретінде мәңгілік сақталады. Орны толмас қайғыны бөлісе отырып, Сізге және барша жақын туыстарыңызға осындай қиын сәтте сабыр тілеймін", – деп жазылған жеделхатта.
Айта кетсек, 18 сәуірде Түркіменстан президенті Гурбангулы Бердымұхамедовтың 89 жастағы әкесі Мәлікулы Бердымұхамедов қайтыс болды.
Түрікменстан ішкі істер министрлігінде жұмыс істеген жылдар ішінде аға Бердімұхамедов түрлі қызметтер атқарды. 1982 жылы подполковник шенімен зейнетке шыққаннан кейін ұзақ жылдар бойы Ұлттық білім беру институтында, Педагогика ғылымдарының ғылыми-зерттеу институтында оқытушы болып жұмыс істеді және Ашхабад қаласының білім басқармасында да қызмет атқарды.
