23 маусым: Қазақстанның басым бөлігінде аптап ыстық болады деп күтіледі
pixabay.com
Синоптиктер 23 маусымға арналған ауа-райы болжамымен бөлісті, деп хабарлайды zakon.kz.
Республикамыздың солтүстік-батысы мен шығыс жартысында атмосфералық фронтальды бөліктердің өтуіне байланысты тұрақсыз ауа-райы күтіледі: найзағай ойнап, бұршақ аралас жаңбыр жауады, солтүстікте кей жерлерде күндіз нөсер жаууы ықтимал. Ал Қазақстан Республикасының батыс бөлігінде антициклон мен жылы ауа массаларының әсерінен жауын-шашынсыз ыстық ауа-райы сақталады. Республикамыздың кей жерлерінде желдің күшейіп, оңтүстікте шаңды дауыл болады деп болжанады, деп хабарлайды "Қазгидромет" РМК.
Ақмола, Солтүстік Қазақстан облыстарында бұршақ түседі, кей жерлерде күндіз жел күшейеді, екпіні 15-20, кей жерлерде 23-28 м / с құрайды.
Күндіз Павлодар облысында бұршақ түсіп, қатты жел тұрады, екпіні - 15-20 м / с.
Қостанай облысында кей жерлерде бұршақ түсіп, дауыл тұрады деп күтіледі, желдің екпіні 15-20, кей жерлерде 25 м / с құрайды.
Қарағанды облысында, күндіз Шығыс Қазақстан облысында, Жамбыл облысында да бұршақ түсуі мүмкін, жел екпіні - 15-20 м / с.
Түркістан облысында кей жерлерінде шаңды дауыл тұрады, екпіні -15-20 м / с.
Күндіз Қызылорда, Маңғыстау, Ақтөбе облыстарында кей жерлерінде жел 15-20 м / с жылдамдықпен ұйытқиды деп күтіледі, Маңғыстау облысында - шаңды дауыл.
Болжамға сәйкес, күндіз Батыс Қазақстан, Ақтөбе, Маңғыстау облыстарының кей жерлерінде қатты ыстық, Атырау облысында кей жерлерінде өте қатты - аптап ыстық күтіледі. Көбіне Қызылорда, Ақтөбе, Түркістан, Маңғыстау, Жамбыл, Қарағанды, Атырау, Батыс Қазақстан, Қостанай, Алматы облыстарында төтенше өрт қаупі күтіледі, деп хабарлайды "Қазгидромет" РМК.
