Білім министрі: Опат болған әскери қызметкерлердің балаларына гранттар ұсынылады

Әлеуметтік желі, сурет - Zakon.kz жаңалық 14.01.2022 23:38

Сурет: ҚР Премьер-министрінің баспасөз қызметі

ҚР Білім және ғылым министрі Асхат Аймағамбетов маңызды бірнеше мәлімдеме жасады, деп хабарлайды Zakon.kz

Әлеуметтік желіде министр өз ведомствосының алдына сапалы білімге қол жеткізуді қамтамасыз етуге бағытталған бірнеше міндеттер қойылғанын әрі осы тапсырмаларды министрлік орындауға кірісіп кеткенін айтты.

Президенттің тапсырмасына сәйкес, қызметтерін орындау кезінде қаза тапқан әскери қызметшілердің, құқық қорғау және арнаулы мемлекеттік органдар қызметкерлерінің балаларына, жоғары оқу орындары мен колледждерде оқуы үшін гранттар беру жөніндегі норманы қабылдау жоспарлануда. Мемлекет тарапынан мұндай қолдау қажетті шара болып табылатынына сенімдімін. Жақында болған қайғылы оқиғалар кезінде біз олардың ерлігінің куәсі болдық, азаматтарды өз өмірлерін аямай қорғады.ҚР Білім және ғылым министрі Асхат Аймағамбетов

Министр кадр тапшылығы байқалатын және білім сапасында үлкен алшақтық бар өңірлерге үздік педагогтерді тарту мәселесіне де тоқталды.

Президенттің тапсырмасы бойынша, біз қолдау шараларының тиісті пакетімен осы өңірлерге үздік педагогтерді тарту жөнінде арнайы бағдарлама әзірлеп жатырмыз. Педагогтердің осы салаларда жұмыс істеуіне мүдделі болуы үшін біз жалақының арттыру коэффициентін белгілеу, тұрғын үй беру немесе тұрғын үйді жалға алу құнын өтеу, коммуналдық қызметтерді төлеу өтемақысы және т.б. осы сияқты әлеуметтік қолдау шараларын ұсынамыз. Мұндай әлеуметтік пакет арнайы рәсімнен өтіп, белгілі бір өлшемдерге сәйкес келетін және белгілі бір мектептерге жұмысқа ауысатын мұғалімдерге беріледі. Нақты іске асыратын кейбір тетіктерін әлі де талқылайтын боламыз. ҚР Білім және ғылым министрі Асхат Аймағамбетов

Тағы бір бағыт – 5 шетелдік ЖОО филиалдарын ашу. Бұл шара отандық университеттер арасында бәсекелестікті арттыруға да мүмкіндік береді.

Біз осы бағыттағы жұмысқа кіріскенімізді атап өткім келеді. 2021 жылдың қыркүйегінде Де Монтфорт Лестер Британ университетінің (De Montfort University Leicester) филиалы ашылды. Сонымен қатар, Қозыбаев атындағы университетті Аризона университетіне сенімгерлік басқаруға беру мәселесі пысықталуда. Еліміздің батыс өңірлеріндегі жастардың жоғары білімге қол жеткізуін арттыру үшін онда екі жетекші шетелдік техникалық университеттің филиалдары ашылатын болады. Сондай-ақ, Президенттің тапсырмасына сәйкес, Ресейдің үздік техникалық университетінің филиалын ашу бойынша жұмыстар жүргізілуде. Басқа да әлемдік деңгейдегі университеттердің филиалдарын ашу бойынша жұмыс жүргізілуде. ҚР Білім және ғылым министрі Асхат Аймағамбетов

Сондай-ақ, білім беру сапасында үлкен алшақтығы бар өңірлерден оқуға түсушілер үшін техникалық дайындық бағыттары бойынша қосымша гранттар бөлу жоспарлануда.

Аталған мақсатты гранттар еліміздің жетекші жоғары оқу орындарында білім алу үшін бөлінетін болады. Бұл ретте негізгі тұрғылықты жері бойынша бітірушілердің жұмыспен қамтуды шарттардың бірі ретінде бекіту ұсынылады. Ағымдағы жылдың өзінде техникалық дайындық бағыттары бойынша жоғары оқу орындарында оқу үшін гранттар саны айтарлықтай өсетін болады. ҚР Білім және ғылым министрі Асхат Аймағамбетов

Оқи отырыңыз