Алматыдағы әл-Хамид мешіті несімен ерекше

әл-Хамид мешіті Сурет: Zakon.kz
Алматыдағы ғибадат орындары бір-бірінен көлемі, сыртқы бейнесі арқылы ерекшеленіп тұрады. Zakon.kz қасиетті Рамазан айында Алматыдағы жамағат көп жиналатын мешіттер туралы деректер ұсынады. Өткен жолы Алматы Орталық мешітінің тарихына тоқталсақ, бұл жолы әл-Хамид мешіті туралы айтамыз.

«әл-Хамид» – Алланың 99 есімінің бірі. Ол пәк, пәктеулі, дәріптеулі, мақтаулы деген мағынаны береді. Алматының Көктөбе жағында сәл биіктеу орналасқан әрі кейінгі 15 жылда ашылған ғибадат орындарының бірі – әл-Хамид мешіті. Бұл мешіт 2011 жылы көктемде ашылды.

Мешіттің бір негізгі күмбезі, төрт кіші күмбезі және бір минареті бар.

Мешіт үш қабаттан тұрады. Негізгі зал екінші қабатта орналасқан. Сонымен қатар екінші қабатта имамдардың бөлмесі бар. Ал әйелдер құлшылық жасайтын орын үшінші қабатта.

әл-Хамид мешіті

Сурет: Zakon.kz

Мешітте бір уақытта 1500-2000 адам намаз оқи алады.

Мешіттің ішкі жағы қазақы оюлармен өрнектелген. Мешіт қызметкерлерінің айтуынша, жылтыр оюлар алтынмен жалатылған. Ондай оюлар ғимараттың сыртқы қабырғасында да бар. Әл-Хамид мешітіне келгендер сыртқы көрінісіне қарап, жаңадан ашылған құлшылық орны екенін бірден байқайтын көрінеді.

әл-Хамид мешіті

Сурет: Zakon.kz

Мешіттің ең негізгі ерекшеліктерінің бірі – кисва (кисуах). Кисва дегеніміз қағбаның сыртын айналдыра қоршап қаптайтын материал, жамылғы. Ол қара жібек матаға алтын жіппен көркемделіп жасалады. Онда құран аяттары жазылған.

әл-Хамид мешіті

Сурет: Zakon.kz

Әл-Хамид мешітінің екінші қабаттағы негізгі залына, михрабына бір кисва, сонымен қатар екі қабырғаға кішірек екі кисва, барлығы үш кисва қойылған.

әл-Хамид мешіті

Сурет: Zakon.kz

Мешітте ілініп тұрған 20 аспашамда Ислам дінінің бір белгісі ретінде көрінетін ай бар. Мұндай аспашам арнайы тапсырыспен алынған және алғаш осы мешітке әкелінді. Кейіннен мұндай аспашам басқа да мешіттерге ілінді.

«әл-Хамид – қаладағы ең таза мешіттердің бірі. Деңгейі Дубайдағы мешіттермен теңеседі. Тау етегінде орналасқанымен де ерекшеленіп тұрады», – дейді мешіт имамдары.
Мешіттің ішкі қабырғасына 1 метр 2О сантиметрге дейін мрамор жабыстырылған. Мұндай тәсіл қабырғаға адамдар сүйкенгенде бүлінбес үшін жасалған. Сонымен қатар қабырғадағы мрамор мешіттің температурасын салқын, бір қалыпты етіп ұстап тұрады.

әл-Хамид мешіті

Сурет: Zakon.kz

Ал мешіт ғимаратының сырты травертин материалымен қапталған. Ол мешіттің сырты бүлінбей, түсі өңбей тұруына көмектеседі.

әл-Хамид мешіті

Сурет: Zakon.kz

Мешіттегі кітап сөрелерінен бірнеше Құран кітаптарын таба аласыз. Қазақша аудармасы да бар. Мұнда құран оқып үйрену сабақтары да өтеді.

Мешіт имамдарының айтуынша, әл-Хамид мешіті бірнеше жыл тазалығымен көзге түсіп келеді. Мұнда әр жұма жамағат көп жиналады.

Рамазан айында әл-Хамид мешітінде 150-250 адамға күнде ауызашар беріліп жатыр. Сонымен қатар мешітте басқа да ғибадат орындарындағыдай қайырымдылық шаралары ұйымдастырылады. Мұндай шарада мешітке өтініш білдірген көмекке мұқтаж отбасыларға азық-түлік таратылады, әрі Рамазан айында 3-4 мәрте ұйымдастырылады. Қайырымдылық шараларында 50-100 отбасыға азық-түлік беріледі.

Басты Топ LIVE Бәрі
bellz
Жаңалықтар трендінде болыңыз!
Хабарландыруларды қосыңыз және алдымен расталған жаңалықтарды алыңыз.

Браузерде хабарландыруларды кез келген уақытта өшіруге болады

Біздің хабарландыруға жазылыңыз!
Хабарландыру қосу үшін қоңырау белгісін басыңыз