Елге кіре алмай шекарада жатқан отандастарымыз видео үндеу жолдады
Сурет: zakon.kz
Қазақстан азаматы төрт күннен бері «Дәуіт ата-Тәжен» өткізу бекетінде қалып қойған. Шекарада жіпсіз байланғандар көлікте түнеп, тамағын да сонда ішіп жүр. Бірнеше күннен бері үй көрмей, азып-тозып кеттік дейді олар. Бірі көрші елге емге барса, енді бірі той-садақаға қатысып келе жатыр екен. Нүкістегі ереуілден кейін, шекара жабылып, отандастарымыз шарасыз күйге түскен, делінеді КТК жаңалықтарында.
Мына жерде әйел, балашаға бар. Денсаулығы нашар адамдар бар. Скорыйлар келіп хабар алып жатыр. Бізді осы Қазақстан азаматтарын өз еліне аштырып, Өзбекстанмен байланыс құрып, өткізуін сұраймыз. 60-тың үстінде адам бар. 16 жеңіл көлігі бар, 200 үстінде жүк көлігі бар фуралар. Постты 1 сағатқа ашса, Қазақстан азаматтарын өткізіп алса деген үмітпенен видео үндеу жасап отырмыз. Маңғыстау облысының тұрғыны Сәтбай Османов
Шекарада қалған азаматтарға Өзбекстандағы елшілік қызметкерлері көмек қолын созып, ас-ауқатын алып беріпті. Елге кіре алмай қалғандардың мәселесін Сыртқы Істер министрлігі де біледі. Қазір қос тарап келіссөздер жүргізіп, Қазақстан азаматтарын елге қайтару жағы талқыланып жатыр екен.
Бұл мәселе біздің Өзбекстандағы дипломаттарымыздың ерекше бақылауында. Қазіргі таңда біз өзбек тарапымен тығыз жұмыс істеп жатырмыз. Келіссөздер өткізілуде. Біздің ойымызша жақын арада бұл мәселе шешілуі тиіс. Өздеріңіз білетіндей қазір бұл елде төтенше жағдай режимі енгізілген. Сондықтан кішкене қиындықтар туып жатыр. Жалпы біз азаматтармен байланыстамыз оларға үш мезгіл тамақ ұйымдастырылған.ҚР Сыртқы Істер министрлігінің ресми өкілі Айбек Смадияров
Шекарадағыларға енді қос тараптың ортасындағы келіссөздер аяқталғанша, күтуден басқа амал жоқ.
Айта кетсек, Қарақалпақстан астанасы Нүкіс қаласында 1 шілде күні жаппай ереуіл басталып, арты қақтығысқа ұласқан болатын. Жергілікті халық референдумдағы өзгерістерге қарсы шықты. Жаппай наразылық кезінде, ресми дерек бойынша 18 адам қаза тапқан. Осыған байланысты Өзбекстан президенті Қарақалпақстан аумағында 1-шілде мен 2-ші тамыз аралығында төтенше жағдай жарияланды.
