Баян Мақсатқызының "Бақыт" фильмі "Алтын глобустың" марапаттар тізіміне енді

"Бақыт" фильмі, сурет - Zakon.kz жаңалық 30.11.2022 13:51

Сурет: Instagram/bayanmaxatkyzy

Сүйінші хабарды "Бақыт" фильмінің продюсері Баян Мақсатқызы мен фильмнің сценариін жазған Әсем Жәпішева бөлісті, деп хабарлайды Zakon.kz.

"Сүйінші! Біздің фильм "Алтын глобус" марапаттар тізіміне енді. Жобаның бір бөлігі болғаныма қуаныштымын және ризамын. Тамаша команда мен фильмнің фестивальдерге қатысып жүргені үшін ғана емес, сонымен қатар туынды тұрмыстағы зорлық-зомбылық туралы өте маңызды тақырыпты көтергені үшін ризамын", - деп жазды Әсем Жәпішева.

Продюсер Баян Мақсатқызы да "Бақыт" фильмі туралы Instagram-дағы парақшасында бөлісті. Бұған дейін продюсер Үндістандағы фестивальде жүргені туралы жазған еді.

"Биыл біздің "Бақыт" фильміміз 15 халықаралық кинофестивальге қатысты, GOA-дағы фестиваль - он алтыншысы. Біздің қоржынымызда жеті үлкен марапат бар. Оның бастысы - БЕРЛИНАЛда алғанымыз. Алда үлкен жол тұр. Қазақстанда фильмді прокатқа шығарамыз және Асқармен әйел тағдыры туралы екінші фильмге кірісеміз", - деп жазды Баян Мақсатқызы өзінің Instagram-дағы парақшасында.

"Бақыт" - режиссер Асқар Ұзабаевтың әйел тағдыры туралы фильмі. Продюсері - Баян Мақсатқызы. Сценариін жазған - Әсем Жәпішева. Фильм Қазақстанда әлі прокатқа шыққан жоқ. Дегенмен түрлі фестивальдерге қатысып, жүлделі орындарға ие болды.

Оқи отырыңыз